კითხვა: აუცილებელია თუ არა, რომ მორწმუნე მამაკაცმა ატაროს წვერი? სასულიერო პირების უმრავლესობა ხომ წვერით დადის.
პასუხი: ეს აუცილებელი არ არის. თუმცა, ქრისტიანული ტრადიციით, ეკლესიურად მცხოვრები პიროვნება ხშირად ატარებს წვერს, რათა გარეგნულად მიემსგავსოს თავის მოძღვარს – იესო ქრისტეს.
კითხვა: აუცილებელია თუ არა სანთელი, რომელსაც უფლისა და წმინდანებისთვის ვანთებთ, ჩვენი ფულით იყოს შეძენილი?
პასუხი: სამწუხაროდ, ხშირად ადამიანები ყურადღებას ანიჭებენ უფრო მეორეხარისხოვანს, ვიდრე მთავარს. მნიშვნელობა არ აქვს, რამდენ სანთელს აანთებთ, ან ვისი ფულით იქნება ის შეძენილი, მთავარია, თქვენი რწმენა და სინანული საკუთარი ცოდვების გამო.
კითხვა: ლოცვის დროს ხშირად ვგრძნობ ხატების დამოკიდებულებას ჩემ მიმართ. მინდა, სწორად გამიგოთ – ვგრძნობ მათ კეთილგანწყობას, თანაგრძნობას, ხან კი თითქოს მემდურიან. ეს, ალბათ, ჩემი ფანტაზიის ნაყოფია, მაგრამ მირჩიეთ, როგორ მოვიქცე?
პასუხი: გირჩევთ, მსგავს განცდებს არ აჰყვეთ და არ მიენდოთ. როგორც ჩანს, თქვენსავე დამოკიდებულებას ამა თუ იმ საკითხისადმი ხედავთ ხატებზე, რაც მართლაც ფანტაზიის ნაყოფია. დადექით ხატთან, როგორც ლოცვის საგანთან და სთხოვეთ მეოხება.
კითხვა: რატომ არის ღვთისმშობლის გამოსახულებაზე სამი ვარსკვლავი – ერთი შუბლზე და ორივე მხარზე?
პასუხი: იმიტომ, რომ ღვთისმშობელი არის ქალწული ქრისტეს შობამდე, შობისას და შობის მერეც.