კითხვა: ნათლიამ მაჩუქა უფლის ხატი. მე ლოცვა წარმოვთქვი და ნაკურთხი წყალი ვაპკურე. გახდა თუ არა ეს ხატი ნაკურთხი?
პასუხი: რა თქმა უნდა, თქვენი ხატი არ არის ნაკურთხი. ხატების კურთხევა ხდება მღვდელმსახურის მიერ.
კითხვა: მე ჩემს თავს არ მივიჩნევ წმინდა ზიარების ღირსად და ამიტომ, იშვიათად ვეზიარები. სწორად ვიქცევი თუ არა?
პასუხი: ვართ თუ არა წმინდა ზიარების ღირსი, ანუ ქრისტეს სისხლისა და ხორცის მიღებისა – ამის მსაჯულად დადგენილნი არიან მღვდელმსახურნი აღსარების საიდუმლოების პროცესში. ხოლო ის, ვინც თვითნებურად აყენებს თავს ზიარების მიღმა, არასწორად იქცევა და ემსგავსება ერეტიკოსსა და წარმართს.
კითხვა: რა სიმბოლოს განასახიერებს ქრისტიანთა მიერ ერთი ბარძიმიდან მიღებული ზიარება?
პასუხი: ერთი ბარძიმიდან წმინდა საიდუმლოს მიღებაში უნდა ვიგულისხმოთ ყველა მართლმადიდებელი ქრისტიანის ჭეშმარიტი ძმობა და დობა, რომლითაც – განურჩევლად მათი მდგომარეობისა, განათლებისა და მატერიალური სახსრებისა, ერთმანეთის მიმართ არ გააჩნიათ სიძულვილისა და მიუღებლობის გრძნობა. პირიქით, უხარიათ, რომ შესაძლებლობა აქვთ, ერთი ბარძიმიდან მიიღონ წმინდა ძღვენი.
კითხვა: ისჯება თუ არა ნაქურდალის მიმღები?
პასუხი: ნაქურდალის მიმღები ისევე ისჯება, როგორც ქურდი.