სოფლის მეურნეობის მინისტრის პირველი მოადგილე და საპარლამენტო მდივანი ნოდარ კერესელიძე 1982 წელსაა დაბადებული თბილისში. საბაკალავრო უმაღლესი განათლება 1999-2004 წლებში თბილისის სახელმწიფო უნივერსიტეტში მიიღო, სადაც ორ ფაკულტეტზე სწავლობდა და, შესაბამისად, დაეუფლა ორ სპეციალობას – საერთაშორისო სამართალსა და საბანკო და საფინანსო საქმეს. 2005-2006 წლებში დუნაის უნივერსიტეტში მიიღო სამაგისტრო განათლება სპეციალიზაციით – ევროკავშირის სამართალი,   პოლიტიკა და ბიზნესი. 2012-2014 წლებში მასაჩუსეტსის უნივერსიტეტში გახდა საჯარო პოლიტიკისა და ადმინისტრირების მაგისტრი. მისი სამუშაო გამოცდილება კი 2004  წლიდან იწყება, როგორც ეროვნულ-დემოკრატიული ინსტიტუტის საპარლამენტო სტაჟიორისა, 2005-ში უკვე საქართველოს საგარეო საქმეთა სამინისტროს საერთაშორისო ორგანიზაციების სამმართველოს ატაშედ დაინიშნა; 2006-2007 წლებში  საქართველოს პარლამენტის თავმჯდომარის მრჩეველთა საბჭოს მკვლევარი იყო; ხოლო 2007-2008 წლებში – ევროპის საჯარო სამართლის ორგანიზაციის მკვლევარი (ათენში); იმავე წლებში კავკასიის უნივერსიტეტის სამართლის სკოლის სამაგისტრო პროგრამების დირექტორიც გახლდათ. 2008-2009 წლებში საქართველოს სოფლის მეურნეობის მინისტრის მრჩევლის ფუნქციას ასრულებდა;  2009-ში სოფლის მეურნეობის სამინისტროს მარკეტინგული კვლევისა და სტრატეგიული განვითარების სამმართველოს უფროსად დაინიშნა; შემდეგ (2012-წლამდე) იმავე სამინისტროს საერთაშორისო ურთიერთობების დეპარტამენტის უფროსად გადაიყვანეს; 2013 წელს მაკკეინის ინსტიტუტის საერთაშორისო მკვლევრად მუშაობდა, 2013-2014 წლებში – მასაჩუსეტსის უნივერსიტეტის მკვლევრად; 2014 წლის ნოემბრიდან დღემდე კი საქართველოს სოფლის მეურნეობის მინისტრის პირველი მოადგილეა.
რაკი ჩინოვნიკური სტაჟი აქვს, ბ-ნი კერესელიძის მიერ პირველად შევსებული დეკლარაცია 2009 წლით თარიღდება, რომელიც მან შეავსო, როგორც სოფლის მეურნეობის სამინისტროს მარკეტინგული კვლევისა და სტრატეგიული სამმართველოს უფროსმა და ოჯახის წევრებად მიუთითა მამა – ბატონი დავითი, დედა – ქალბატონი მარინე და ძმა – ივანე. იმხანად ივანე კერესელიძის საკუთრება იყო საცხოვრებელი ბინა აბასთუმანში, დავით კერესელიძის კი – საცხოვრებელი ბინა თბილისში, ფალიაშვილის ქუჩაზე (170 კვ. მ.) და აგარაკი ტაბახმელაში (მიწის ნაკვეთი 600 კვ. მ., სახლი – 80 კვ. მ.), მასვე ჰყავდა 2007 წლის ავტომანქანა „შევროლე ნივა“. ასევე, მისი საკუთრება იყო 10 000 ლარზე ძვირად ღირებული ფერწერული ტილო და ანტიკვარული კარადა. თუმცა ნოდარ კერესელიძეს ჰქონდა ნაღდი ფული დეკლარაციის შევსების დროს – 5 000 ლარი.
რაც შეეხება შემოსავლებს: 2008 წლის განმავლობაში ნოდარ კერესელიძემ, როგორც მინისტრის მრჩეველმა, 12 000 ლარი აიღო, ხოლო, როგორც კავკასიის უნივერსიტეტის თანამშრომელმა, 3020 ლარი; დავით კერესელიძემ, როგორც თსუ-ის პროფესორმა, 7 200 ლარი, მარინე კერესელიძემ, როგორც სამედიცინო უნივერსიტეტის სპეციალისტმა, 3 600 ლარი, დავით კერესელიძემ, როგორც „ბაგრატიონი 1882-ის“   იმპორტისა და ექსპორტის მენეჯერის თანაშემწემ – 510 ლარი.
ნოდარ კერესელიძის მიერ ბოლოს შევსებული დეკლარაცია 2014 წლით თარიღდება. მისი ოჯახის წევრების ოდენობა უცვლელია; უძრავი ქონების ოდენობაც და ნოდარ კერესელიძესაც კვლავ არაფერი აქვს ქონებრივ ანგარიშზე. რაც შეეხება მოძრავ ქონებას: ივანე კერესელიძის საკუთრებაა 2001 წლის „ფოლკსვაგენ პასატი“, დავით კერესელიძის – 2000 წლის „მერსედესი“, როიალი „პეტროფი“, ვაგნერის ფერწერული ტილო, მარინე კერესელიძე კი ზურაბ ნიჟარაძის ნამუშევრის მფლობელია.
დეკლარაციის შევსების დროს ნაღდი ფული მხოლოდ ნოდარ კერესელიძეს ჰქონდა – 5 000 აშშ დოლარი. რაც შეეხება შემოსავლებს: 2013 წლის განმავლობაში ნოდარ კერესელიძემ, როგორც მასაჩუსეტსის უნივერსიტეტის პროგრამის ასისტენტმა, 5 000 აშშ დოლარი მიიღო; დავით კერესელიძემ, როგორც თსუ-ის პროფესორმა, 19 800 ლარი; მარინე კერესელიძემ, როგორც თბილისის სახელმწიფო სამედიცინო უნივერსიტეტის სპეციალისტმა, 7 200 ლარი; ივანე კერესელიძემ, როგორც „ბაგრატიონი 1882-ის“ მენეჯერმა, 6 000 ლარი, ხოლო, როგორც შრომის, ჯანმრთელობისა და სოციალური დაცვის სამინისტროს საყოველთაო ჯანდაცვის დეპარტამენტის პირველადი დოკუმენტაციის მართვის სამმართველოს უფროსმა სპეციალისტმა, 1 800 ლარი.