აწ უკვე ეკონომიკის მინისტრი (მანამდე პირველი მოადგილე 2012 წლის 30 ოქტომბრიდან) დიმიტრი ქუმსიშვილი 1974 წელსაა დაბადებული. მისი განათლება ტექნიკურია, კერძოდ: დაამთავრა კომაროვის სახელობის ფიზიკა-მათემატიკური სკოლა, თსუ-ის ეკონომიკის ფაკულტეტი (სპეციალობით: აღრიცხვა, კონტროლი, აუდიტი), 2005-2007-წლებში კი „სერმა მენეჯმენტის სკოლაში“ გაიარა ბიზნესადმინისტრირების მაგისტრის პროგრამა.
მის მიერ პირველად შევსებული დეკლარაცია 2012 წლით თარიღდება, რომელშიც ის ოჯახის წევრებად მიუთითებს მეუღლეს, ნატალია თევდორაშვილსა და სამ შვილს – იოსებს, ირაკლისა და ნინოს. იმხანად დიმიტრი ქუმსიშვილის საკუთრებად ირიცხებოდა: საცხოვრებელი ბინები თბილისში: ორი თამარ მეფის გამზირზე (ფართობი 24 კვ.მ და 34 კვ.მ) და ერთი შარტავას ქუჩაზე (ფართობი 189 კვ.მ); ასევე, საცხოვრებელი სახლი თბილისში, ლამისყანის ქუჩაზე (ფართობი 312 კვ.მ) და იქვე მდებარე მიწის ნაკვეთი (ფართობი 451 კვ.მ). ნატალია თევდორაშვილის საკუთრებად კი – ორი საცხოვრებელი ბინა თბილისში, გიორგი ბრწყინვალის ქუჩაზე (ფართობი 55 კვ.მ) და ქავთარაძის ქუჩაზე (ფართობი 58 კვ. მ); ასევე, მიწის 2 ნაკვეთი წყნეთში  (ფართობი 603 და 504 კვ.მ). იოსებ ქუმსიშვილსა და დიმიტრი ქუმსიშვილს კი ერთად ეკუთვნით საცხოვრებელი ბინა თბილისში, ვაჟა-ფშაველას გამზირზე (ფართობი 40 კვ.მ).
დიმიტრი ქუმსიშვილს ჰყავდა 2006 წლის „მერსედესი“, მის მეუღლეს – იმავე ასაკის „ჰიუნდაი ტიუსონი“. ასევე, დიმიტრი ქუმსიშვილს ჰქონდა „რიკო კრედიტის“ 20 000 აშშ დოლარის ღირებულების თამასუქი; „ქართუ ბანკში“ გახსნილ დეპოზიტზე 1 000 აშშ დოლარს ინახავდა, „თი ბი სი ბანკში“ – 20 000 აშშ დოლარს. ნატალია თევდორაშვილი კი – 40 000 აშშ დოლარსა და 4 000 ევროს.
რაც შეეხება შემოსავლებს: 2011 წლის განმავლობაში დიმიტრი ქუმსიშვილმა, როგორც „ქართუს“ გენერალური დირექტორის პირველმა მოადგილემ, 89 040 ლარი აიღო; როგორც „კვირის პალიტრის“ ბიზნესის განვითარების დირექტორმა – 5 000 ლარი. აქციების რეალიზაციამ 13 095 ლარი მოუტანა, 12 000 აშშ დოლარი კი – ავტომანქანის გასხვისებამ, თუმცა ახალ ავტომობილში 20 000 აშშ დოლარი გადაიხადა.
2014 წლის დეკლარაციით ვიგებთ, რომ დიმიტრი ქუმსიშვილი არის შპს „საქართველოს აეროპორტების გაერთიანების” სამეთვალყურეო საბჭოს თავმჯდომარე (2010 წლიდან); ასევე, შპს „რეშენალ სოლუშენსის” პარტნიორი (2011 წლიდან), რამაც მას 2013 წლის განმავლობაში 8 700 ლარი მოუტანა და შპს „ავტოსერვისის” პარტნიორი (2003 წლიდან).
რაც შეეხება სხვა შემოსავლებს: 2013 წლის განმავლობაში დიმიტრი ქუმსიშვილმა, როგორც ეკონომიკის მინისტრის პირველმა მოადგილემ, 92 350 ლარი აიღო. მისი თამასუქის სარგებელმა 4 528 ლარი შეადგინა, ხოლო შვილის, ირაკლის სწავლის გადასახადმა – 5 200 ლარი.
სულ ბოლო დეკლარაცია დიმიტრი ქუმსიშვილმა 2015 წელს შეავსო. არ შეცვლილა არც მისი ოჯახის წევრთა რაოდენობა, თუმცა მის უძრავ ქონებას დაემატა კიდევ ერთი საცხოვრებელი ბინა თბილისში, ჯიქიას ქუჩაზე (ფართობი – 91 კვ. მ.).
ბოლო მონაცემებით, დიმიტრი ქუმსიშვილი ორ დეპოზიტზე 1 000 და 3 377 აშშ დოლარს ინახავს, ნატალია თევდორაშვილი – 26 604 აშშ დოლარსა და 6 842 ევროს. ხოლო დეკლარაციის შევსების მომენტში ნაღდი ფული მხოლოდ მინისტრს ჰქონდა – 5 000 აშშ დოლარი. დიმიტრი ქუმსიშვილი ამჟამადაც სამ გპს-ში ეწევა სამეწარმეო საქმიანობას, მაგრამ შემოსავალი 19 475 ლარი კვლავ ერთმა – „რეშენალ სოლუშენსმა” მოუტანა.
რაც შეეხება შემოსავლებს: დეკლარაციის ავტორმა, როგორც მინისტრის პირველმა მოადგილემ, 86 775 ლარი აიღო, თამასუქის სარგებლად კი – 2 279 აშშ დოლარი; ხოლო მისმა მეუღლემ, როგორც შპს „მიტარბის“ კონსულტანტმა – 2 614 ლარი, დეპოზიტზე კი 2 246 აშშ დოლარი დაერიცხა. რაც შეეხება გასავლებს: შვილების – ირაკლისა და ნინოს სწავლა ოჯახს 7 500 ლარი დაუჯდა; ამას გარდა, ორი სესხის მომსახურება – 20 000 აშშ დოლარი და 10 900 ლარი, ხოლო ჯიქიას ქუჩაზე ბინის შეძენა – 59 000 აშშ დოლარი.