ბევრს ჰგონია, რომ ზღვაზე ყოფნისას, ყოველდღე წყალში ჩასვლითა და 10 წუთი ფართხალით უამრავ კალორიას დაწვავს, სახლში გამხდარი დაბრუნდება და თავისი მშვენიერი სპორტული სხეულით ფურორს მოახდენს სამსახურშიც და მეგობართა წრეშიც, მაგრამ, სამწუხაროდ, ეს ასე არ არის. პირველ ყოვლისა, უნდა გახსოვდეთ, რომ შვებულების დღეების იმედად ყოფნა (გახდომის თვალსაზრისით) დიდი შეცდომაა, თუკი ამ დღეების ყოველ საათს გონივრულად არ გამოიყენებთ. გონივრულობაში კი იგულისხმება არა შეზლონგზე ნებივრობა, წიგნის კითხვა ან „ჯოკერის“ თამაში, არამედ, აქტიური დასვენება: სწრაფი ცურვა, პლაჟის ხელბურთი (ან ნებისმიერი სხვა სპორტული თამაში), დილა-საღამოს (ცურვის პარალელურად) ფეხით ან ველოსიპედით სეირნობა; კარგი შედეგი აქვს, ასევე, წყლის ველოსიპედსა და ნიჩბებიან ნავს – მოკლედ, არჩევანი თქვენზეა, მაგრამ ამ ჩამონათვალში უმთავრესი მაინც ცურვაა, ოღონდ, უნდა იცოდეთ, ცურვის რომელი სტილი კონკრეტულად რაში დაგეხმარებათ.
მათ, ვინც ცურვით გადაწყვიტეთ გახდომა, აუცილებლად უნდა გაითვალისწინოთ ერთი მთავარი პირობა: უნდა ცვალოთ ცურვის სტილი და ინტენსიურობა – ეს დაეხმარება ორგანიზმს, კუნთები ცხიმების დაწვის რეჟიმში ამყოფოს.
გასახდომად ყველაზე შედეგიანად ითვლება ცურვის სახეობა – ბატერფლაი, მაგრამ, ამასთან, ეს ყველაზე რთული სტილია და, შესაბამისად, სპეციალურ მომზადებასაც საჭიროებს.
კროლიც ასევე ყველაზე ეფექტურ სტილად ითვლება გასახდომად, რადგან ეს ცურვის ერთ-ერთი ყველაზე დინამიკური სახეობაა.
ბრასი ყველაზე „დინჯია“ ცურვის სახეობებს შორის, მაგრამ, სამაგიეროდ, შეგიძლიათ, დიდხანს იცუროთ.
ზურგზე ცურვა საუკეთესო გამოსავალია იმისათვის, რომ თან დაისვენოთ და ცურვაც არ შეწყვიტოთ.
მითითება: ბატერფლაით ცურვისას ავარჯიშებთ პრესისა და თეძოების კუნთებს; კროლი ააქტიურებს ზურგის კუნთებს; ბრასი ზედმეტ ცხიმებს მოგაშორებთ ფეხებსა და ბარძაყების შიდა მხარეზე, ოღონდ, იმ შემთხვევაში, თუ ყოველ ბიძგს ფეხებით გააკეთებთ მაქსიმალურად ძლიერად.
რჩევა: იცურავეთ „ლასტებით“ – ასე გაცილებით მეტ კალორიას დაწვავთ.
თუ ნამდვილად გსურთ გახდომა, უნდა დაიცვათ 2 წესი:
1. იცურავეთ რეგულარულად, დაახლოებით ერთსა და იმავე დროს. მართალია, ეს ცოტა მოსაბეზრებელია, მაგრამ, სასურველ აღნაგობას სხვაგვარად ვერ „მიაღწევთ“. თუ ნებისყოფა გეყოფათ საიმისოდ, რომ 6 თვის განმავლობაში მაინც იცურაოთ კვირაში მინიმუმ 3-ჯერ, შედეგით ისეთი აღფრთოვანებული დარჩებით, რომ 6 თვეს უკვე ძალიან ადვილად გადაიყვანთ განუსაზღვრელ ხანგრძლივობაში.
2. ესაა ვარჯიშის ხანგრძლივობა. ცნობილია, რომ ცხიმების „მარაგი“ წვას იწყებს აერობიკის ვარჯიშის დაწყებიდან 20 წუთის შემდეგ. ამიტომ, შედეგის მისაღწევად უნდა იცურაოთ მინიმუმ 30 წუთი. საშუალოდ კი, პაუზების გარეშე უნდა გაცუროთ 600-800 მეტრი (დამწყებებმა – 100-დან 300 მეტრამდე).
მითითება: რატომღაც, ითვლება, რომ გრილ წყალში ცურვით უფრო ადვილად ვიკლებთ წონაში, მაგრამ მეცნიერებმა დაამტკიცეს, რომ 24 გრადუსზე ნაკლები ტემპერატურის მქონე წყალი ხელს უწყობს კანქვეშა ცხიმების დაგროვებას, ამიტომ, გრილ წყალში დიდხანს ბანაობა ამ მხრივ სასურველი არ არის. მეცნიერთა აზრით, კალორიების დასაწვავად წყლის იდეალური ტემპერატურაა 24-დან 28 გრადუსამდე.
მათ კი, ვინც ცურვისას ვერ გრძნობს თავს „როგორც თევზი წყალში“, ანუ არ არის დახელოვნებული მოცურავე, ვთავაზობთ ვარჯიშების კომპლექსს, რომელიც ადვილად მოგაშორებთ ზედმეტ კილოგრამებს (თითოეული ვარჯიში გაიმეორეთ 10-ჯერ):
1. „მაკრატელა“ – შედით წყალში წელამდე. ახტით და, სანამ უკან დაეშვებით, ერთი ფეხი წინ გასწიეთ, მეორე – უკან (თანაბარი მანძილით). ტანი და ფეხები გეჭიროთ სწორად. ფსკერზე დაშვებისას ფეხები ოდნავ მოხარეთ.
2. „შპაგატი“ – გაიმეორეთ პირველი ვარჯიში, ოღონდ ფეხები მაქსიმალურად გაშალეთ სიგანეზე. შეეცადეთ, ზურგი სწორად გეჭიროთ.
ორივე ვარჯიშის დროს გააქტიურებულია ბარძაყის წინა და უკანა მხარეები, პრესისა და დუნდულების კუნთები.
3. მარცხნივ და მარჯვნივ „გადაგორება“ – თუ ღრმა წყალში არ ხართ, „დაწექით” მარცხენა გვერდზე და მუხლები მკერდზე მიიბჯინეთ. შემდეგ ფეხები გამართეთ, „გადაგორდით“ მარჯვენა გვერდზე და მუხლები ისევ მიიბჯინეთ მკერდზე.
ამ დროს აქტიურდება თეძოების, ზურგისა და მუცლის (ირიბი) კუნთები.
რაც შეეხება კვებას, შეიძლება, ცოტა გაგიჭირდეთ „გემრიელობებისა“ და სასუსნავებისგან თავის შეკავება, მაგრამ, როგორც კი ხელი წაგიცდებათ რამე კალორიულ საკვებზე, მაშინვე წარმოიდგინეთ, რომ სახლში დაბრუნებული, დგახართ თქვენს სარკესთან, რომელშიც ვეღარ ეტევით და მაშინვე გადაიფიქრებთ ზედმეტი ლუკმის პირში ჩადებას. თუ მაინც მოხდა ისე, რომ თავი ვერ შეიკავეთ, იმ დღეს ორმაგად იაქტიურეთ: იცურავეთ, ირბინეთ, იარეთ ფეხით და სანაცვლოდ, მეორე დღეს მიირთვით ნაკლები. ზოგადად კი, სასურველია, თუ სალათებს „დაუმეგობრდებით,“ ისიც, მხოლოდ 19 საათამდე.
არ დაგავიწყდეთ, რომ ცურვის (და ნებისმიერი სხვა ვარჯიშის) შემდეგ, 1,5 საათის განმავლობაში არ შეიძლება ჭამა. უფლება გაქვთ, დალიოთ მხოლოდ ჩვეულებრივი სასმელი წყალი, არაუმეტეს 200 მილილიტრისა, პატარა ყლუპებით.