ანაკლიაში 30 ივლისიდან  7 აგვისტოს ჩათვლით ქართული ელექტრონული მუსიკის ფესტივალი GEM Fest-ი გაიმართება. 9 დღის განმავლობაში, თქვენ გექნებათ საშუალება, მსოფლიო დონის დიჯეებთან ერთად, ქართველ შემსრულებლებსაც მოუსმინოთ. მონაწილეთა შორის იქნებიან: არმინ ვან ბიურენი, ელენ ელიენი, დიჯეი ლუჩიანოს, პეტრე ინსპირესკუ, ნინო ქათამაძე, „ნიუტონი“, ბაკურ ბურდული და სხვები.  ანაკლიაში მოწყობილ საზაფხულო კინოთეატრში კი გაიმართება ახალგაზრდა რეჟისორების მოკლემეტრაჟიანი ფილმების ჩვენება. სპეციალურად GEM Fest-თვის  შენდება 5 სცენა და კარვების ქალაქი  ხელოვნური დაჩრდილვით; ასევე, 12 ბარი და 6 კვების ობიექტი. ფესტივალის ტერიტორიაზე მოხვედრას მხოლოდ  Multi Pass-ის შეძენის შემდეგ შეძლებთ – ეს არის პლასტიკური ბარათი, რომელიც საფესტივალო ტერიტორიაზე ულიმიტო შესვლა-გამოსვლის ნებართვას იძლევა. ის სამი სახისაა: კლასიკური მულტიპასი, რომლითაც ისარგებლებთ  9 დღის განმავლობაში (მისი ღირებულება ამ ეტპაზე 200 ლარია); full House Pass, რომლის შეძენის შემთხვევაში კარვითაც იქნებით უზრუნველყოფილი (ამჟამად ის 300 ლარი ღირს) და, ბოლოს, Diamond  Pass, რომლითაც არაერთ ბონუსს მიიღებთ (მისი ღირებულება 1 000 ამერიკულ  დოლარს შეადგენს). ასევე, არსებობს Singl Pass, ანუ, ერთჯერადი  100-ლარიანი ბილეთი. ქართული ელექტრონული მუსიკის ფესტივალს საქველმოქმედო მისიაც აქვს – თითოეული გაყიდული ბილეთიდან 1 ლარი გადაირიცხება 22 წლამდე ასაკის ონკოლოგიური პაციენტებისთვის.
ელექტრონული მუსიკის მოყვარულებს წინ „აბსოლუტური ჯემი“ გელით.