საქართველოს განათლებისა და მეცნიერების მინისტრმა თამარ სანიკიძემ დააჯილდოვა იმ სკოლების მოსწავლეები, რომლებმაც საქართველოს მასშტაბით საგნების მიხედვით პირველი-მეორე-მესამე ადგილები დაიკავეს  და საუკეთესოთა ათეულში მოხვდნენ.
მათემატიკაში, ქიმიაში, ინფორმატიკასა და ისტორიაში წარმატება მოიპოვეს თბილისის დემირელის სახელობის კოლეჯისა და ქუთაისის ნიკო ნიკოლაძის სახელობის სკოლა-ლიცეუმის მოსწავლეებმა. წარმატებულ ახალგაზრდებს ჯილდოები და დიპლომები გადასცა თამარ სანიკიძემ. 9 ივლისს ჩატარებულ ღონისძიებაში მოსწავლეები, ასევე, დასაჩუქრდნენ 1 000, 700, 500 და 50 ლარის ღირებულების კომპიუტერული ტექნიკისა და აქსესუარების სასაჩუქრე ბარათებით.
კოლეჯის მოსწავლეებიდან  ქიმიაში მე-2 ადგილი დაიკავა ელგუჯა გოჯიაშვილმა. ელგუჯა ამავე დროს არის საქართველოს ნაკრების წევრი ამ საგანში; ასევე ქიმიაში მე-3 ადგილზე გავიდა ალექსანდრე ფიჩხაძე;  გიორგი სხირტლაძემ და ნუგზარ ჩხაიძემ  ინფორმატიკის ოლიმპიადაში მე-3 და  მე-4 ადგილები დაიკავეს; თემურ მიქავამ – მათემატიკის, ბაქარ ცირეკიძემ კი ისტორიის ოლიმპიადაში მიაღწიეს წარმატებას. მადლობის სიგელებით დაჯილდოვდა რეიტინგული სიის საუკეთესო სკოლები, მათ შორის, „ჩაღლარის“ საგანმანათლებლო დაწესებულებების – დემირელის სახელობის კერძო კოლეჯი და ქუთაისის ნიკო ნიკოლაძის სახელობის სკოლა-ლიცეუმი. 
განათლებისა და მეცნიერების მინისტრმა, ქალბატონმა თამარ სანიკიძემ, ზემოთაღნიშნული წარმატებიდან გამომდინარე, მადლობის სიგელი გადასცა „ჩაღლარის“ სასწავლო დაწესებულებების სამეთვალყურეო საბჭოს წევრს  – მუსტაფა ემრე ჩაბუქს.