კითხვა: თუ შეიძლება, მასწავლეთ რამე შინაური რეცეპტი სახის გასაწმენდად. თან, ცოტა გაფითრებული ვარ და, მინდა, ჯანსაღი ელფერი მომეცეს სახეზე.
პასუხი: გასწავლით კოსმეტიკური რძის დამზადებას სახლის პირობებში, რომელიც წმენდს, აცოცხლებს, ამკვრივებს და სასიამოვნო ელფერს სძენს კანს. წვრილად დაჭერით (კანიანად) 1 ცალი საშუალო ზომის კიტრი, შეურიეთ 1 ჩაის ჭიქა ნაღები (10-პროცენტიანი ცხიმიანობის), 1 ჩაის კოვზი ზეითუნის ზეთი, კარგად მოურიეთ და შედგით მაცივარში. სახე გაიწმინდეთ დილა-საღამოს, ჩამოიბანეთ გრილი წყლით და წაისვით შესაბამისი მკვებავი.
კითხვა: ძალიან გამიუხეშდა კანი ხელებზე. მითხრეს, რომ კარგია სკრაბის გაკეთება, მაგრამ, არ ვიცი, რომელი ჯობია. თქვენ რას მირჩევთ?
პასუხი: ბლენდერში ათქვიფეთ 3 სადილის კოვზი მარწყვი, 2 ჩაის კოვზი ნუშის რძე და 1 სადილის კოვზი ყავისფერი შაქარი. მიღებული მასა წაისვით ხელებზე, გაიჩერეთ 10 წუთი და დაიმასაჟეთ. ჩამოიბანეთ გრილი წყლით და შემშრალებისთანვე გადაისვით გლიცერინი.
კითხვა: მაქვს ძალიან ცხიმიანი და მხურავლე თავის კანი, რის გამოც თმა ყოველდღე დასაბანი მიხდება. არის თუ არა რამე ხალხური საშუალება ცხიმიანობისა და სიმხურვალის მოსახსნელად?
პასუხი: ასეთი ხალხური რეცეპტი არსებობს: წვრილად დაჭერით 1 საშუალო კონა პიტნა, დაასხით 2 ჩაის ჭიქა მდუღარე  წყალი, დაახურეთ თავსახური და აცადეთ, გაცივდეს. შემდეგ შეურიეთ 1 ცალი ათქვეფილი კვერცხის გული. მიღებული მასა შეიზილეთ თმის ძირებში და წაისვით თმის მთელ სიგრძეზე შამპუნით დაბანის შემდეგ. გაიჩერეთ 5 წუთი და ჩამოიბანეთ თბილი წყლით. ეს პროცედურა ჩაიტარეთ კვირაში 2-ჯერ.
კითხვა: როგორ დავირბილოთ გაუხეშებული ტერფები?
პასუხი: ერთმანეთში შეურიეთ 1 სადილის კოვზი არაჟანი, 2 სადილის კოვზი ყავის ნალექი და 2 სადილის კოვზი მოცხარის პიურე. მიღებული მასა სქლად წაისვით ტერფებზე და გაიჩერეთ 10 წუთი. წრიული მოძრაობით დაიმასაჟეთ ტერფის ყოველი მონაკვეთი და ჩამოიბანეთ გრილი წყლით.