27 წლის მადონა ხ-ია ოჯახური კონფლიქტის შედეგად მძიმედ დაზარალდა. მას სხეულის დაზიანება დედამთილმა, 49 წლის  ელზა წ-ურმა მიაყენა. ახალგაზრდა ქალს ჭრილობა ზურგის არეში დანით  ჰქონდა მიყენებული და დაზიანებული ჰქონდა ფილტვი. ექვსი თვის ორსული ქალის გადარჩენა ექიმებმა ქირურგიული ოპერაციის შედეგად შეძლეს. 

 როგორც საქმის მასალებით გახდა ცნობილი, რძალ-დედამთილს ერთმანეთთან დაძაბული ურთიერთობა ჰქონდა.  მას შემდეგ, რაც ორსულმა რძალმა, დედამთილის კატეგორიული მოთხოვნით,  მისი ბინა დატოვა, ქალმა  ის  ქურდობაში  დაადანაშაულა. ელზა წ-ურმა  დანაშაულის ჩადენის დღეს, სხეულის დაზიანება ჯერ საკუთარ შვილს მიაყენა, შემდეგ კი სახლიდან გაგდებული რძალი მისსავე სახლში დაჭრა. 

  გამოძიებისთვის ცნობილი გახდა, რომ დანაშაულში ეჭვმიტანილი პიროვნება, რომელიც სამართალდამცველებმა ჩადენილი დანაშაულისთვის ინციდენტიდან რამდენიმე საათში დააკავეს, წარსულში  თაღლითობისთვის იყო ნასამართლევი. დაზარალებული მადონა ხ-იას დედის, ეკატერინე ხ-იას ჩვენების მიხედვით,  ელზა წ-ური მას რადენიმე საათში დაუკავშირდა და ინციდენტის გასაიდუმლოება  სთხოვა.  განუცხადა,  რომ  თუ მომხადრის შესახებ  პოლიციაში არაფერს განაცხადებდნენ, მათ სამი ათას ლარს გადაუხდიდა. ეკატერინე ხ-იას ამ საუბრის ფარული ჩანაწერიც ჰქონდა, რაც მან გამოძიებასაც წარუდგინა. ამონაწერი მოწმის ჩვენებიდან: „როდესაც ელზამ ჩემი შვილი დაჭრა, მე სახლში არ ვიყავი. სახლში იყო ჩემი ვაჟი, რომელიც 14 წლისაა და მომხდარს თავიდან  ბოლომდე შეესწრო. სწორედ მან დამირეკა, დედა, მადონა  დაჭრეს და იქნებ, მალე მოხვიდეო. სანამ მე სახლში დავბრუნდი, მადონა მეზობლებს საავადმყოფოში გადაეყვანათ. მათგან და ჩემი შვილისგან გავიგე, რომ მადონა დედამთილმა დაჭრა, რომელსაც ჩემთანაც ცუდი ურთიერთობა ჰქონდა.  მას შემდეგ, რაც ჩემი შვილი სახლიდან გამოაგდო, ხშირად მოგვივარდებოდა ხოლმე, გვეჩხუბებოდა. ჩემს შვილს აბრალებდა, ოქროს სამკაულები მომპარე, თუ არ დამიბრუნებ, გიჩივლებო. მისი მეზობლებისგან ვიცოდი, რომ ხშირად სვამდა, ნასვამი ისეთი აგრესიული იყო, შვილსაც კი სცემდა. იმ დღეს, როგორც მერე გავიგე, სახლში მოგვივარდა და ისეთ დროს დაესხა თავს ჩემს შვილს, როცა მე სახლში არ ვიყავი. მადონა შეტრიალებულა: შენ რა გელაპარაკოო და სწორედ ამ დროს, ორსულ გოგოს დანა ჩაარტყა ზურგში.  ალბათ, ორი საათი იქნებოდა გასული მომხდარიდან, სხვისი ტელეფონით დამირეკა და მითხრა: ეს ამბავი არ გაამხილოთ, თქვით, რომ ვითომ უცნობი ყაჩაღი შემოგივარდათ სახლში და სამი ათას ლარს გაჩუქებთო.  მისი ნათქვამი ტელეფონით ჩავიწერე.”

 ეს ჩანაწერი, როგორც სხვა მტკიცებულებები, მაგალითად დანა, ელზა წ-ურის თითის ანაბეჭდებით, გამოძიებისთვის ქალის მიმართ ბრალის წაყენების საფუძველი გახდა. ელზა წ-ური არ მალავდა, რომ რძალთან ცუდი დამოკიდებულება ჰქონდა, მაგრამ ჩადენილ დანაშაულს არ აღიარებდა. ამბობდა, რომ რძალი და რძლის დედა მის წინააღმდეგ მოქმედებდნენ და ასე იძიებდნენ შურს. გამოძიებას დედის წინააღმდეგ ჩვენება მისცა მისმა შვილმაც, რომელსაც სახეზე  და თავის არეში ფიზიკური ზემოქმედების ნიშნები ემჩნეოდა. მისი განცხადებით, დედამ, რომელიც ნასვამი იყო, შვილს   სხეულის დაზიანება რკინის საგნის დარტყმით მიაყენა.“ „ბოლო ორი თვე დედა განსაკუთრებით აგრესიული იყო. ჯერ მადონა გააგდო სახლიდან, მერე მეც მიმაყოლა. თუმცა, ერთ კვირაში მომთხოვა, თუ ახლა სახლში არ დაბრუნდები, ამ სახლში ფეხი აღარ შემოდგაო. მადონას ქურდობაში ადანაშაულებდა, ამბობდა, რომ სახლიდან ოქროული მოპარა. რამდენჯერმე ვკითხე მადონას, თუ შენ წაიღე სამკაულები, დააბრუნე და ვერავინ გაიგებს-მეთქი. მადონა ქურდობას უარყოფდა. ჩემზეც ისე გაბრაზდა, მეც აღარ მიშვებდა სახლში. იმ დღეს, როდესაც დედაჩემმა მადონა დაჭრა, სახლში ჯერ ჩემზე იყარა ჯავრი _ თავსა და სახეში რკინის ნაჭერი მირტყა. რა აღარ მეძახა – ეგ ქალი, შენზე რვა  წლით უფროსია და ცოლად რამ მოგაყვანინაო. მერე ტაქსი გამოიძახა და სახლიდან წავიდა. ვიფიქრე, მადონასთან მიდიოდა და დავურეკე, რომ გამეფრთხილებინა, მაგრამ არ მომისმინა _ ტელეფონი გამითიშა. მოგვიანებით, ჩვენი საერთო ახლობლებისგან გავიგე, რაც ჩაიდინა მადონას სახლში დედაჩემმა. ის სახლში აღარ დაბრუნებულა _ მოგვიანებით, ჩემი დაკითხვის შემდეგ, დედაჩემი თავისი მეგობრის ბინაში დააკავეს.”

 დანაშაულის დეტალები ცნობილი გახდა დაზარალებულისგანაც. ორსულმა ქალმა დეტალურად აღწერა, როგორ გაუსწორდა მას დედამთილი, რომელმაც ის ჯერ სიტყვიერად გალანძღა, შემდეგ კი ზურგში დანა ჩაარტყა. დანაშაულის იარაღი სამართალდამცველებმა შემთხვევის ადგილიდან ამოიღეს.   სასამართლომ ელზა წ-იურს, რომელმაც წარსულში ექვსწლიანი პატიმრობა მოიხადა,  ამჟამად რვა წლით თავისუფლების აღკვეთა მიუსაჯა.