ანუ შიგ რუსეთის გულში!

გასულ კვირას რფ-ის რელიგიურმა ორგანიზაციამ – „რუსეთის გაერთიანებული ისლამის კონგრესმა“ – ქალაქ მოსკოვის მერსა და სრულიად რუსეთის ხელისუფლებას მიმართა თხოვნით, მისცენ საშუალება, რომ შიგ რუსეთის გულში ააშენონ ვლადიმირ ვლადიმირის ძე პუტინის სახელობის მეჩეთი!
განცხადების ტექსტი ორგანიზაციის ოფიციალურ ვებ-გვერდზე გამოქვეყნდა და მას ასეთი სიტყვები ამშვენებს: „ჩვენ, რუსეთის მუსლიმანების პატრიოტულად განწყობილი ნაწილი, ვითხოვთ ნებართვას, რომ ქალაქ მოსკოვში ავაშენოთ ვლადიმირ ვლადიმიროვიჩის სახელობის მეჩეთი, რომ უკვდავყოთ მისი სახელი ჩვენს მრავალეროვან სამშობლოში და მოსკოვის მერიას ვთხოვთ, გამოგვიყოს მიწა ამ ნაგებობის ასაშენებლად.“
თუმცა რუსეთის „პატრიოტულად განწყობილი მუსლიმანები“ მხოლოდ ამას არ სჯერდებიან და ვლადიმირ ვლადიმიროვიჩისთვის საპრეზიდენტო უფლებამოსილების ვადის გაგრძელებას მოითხოვენ (მსოფლიოში ისეთი რთული  ვითარებაა, უვლადიმირვლადიმიროვიჩობა დაგვაფსებსო!).
ჩვენ არ ვიცით, რა ამოძრავებთ რეალურად ზემოხსენებულ პატრიოტებს – პრ. პუტინის უკვდავყოფა თუ, უბრალოდ, მოსკოვის ცენტრში მეჩეთის ასაშენებლად ტერიტორიის გამოყოფისთვის ოპტიმალური მიზეზი იპოვეს?!