ჩვენს რუბრიკაში ერთი და იმავე კითხვებით მივმართავთ სხვადასხვა სფეროში მოღვაწე და სხვადასხვა სოციალურ საფეხურზე მდგარ ცნობილ ადამიანებს. 

– გაგვეცანით, თუ შეიძლება.

– მე ვარ ელდარ შენგელაია, კინორეჟისორი.

– ყველაზე მძაფრი შეგრძნება, რაც ბავშვობიდან შემოგრჩათ.

– ბავშვობიდან ყველაზე მძაფრი შეგრძნება მქონდა მაშინ, როცა მე და ჩემმა მეგობრებმა პაპიროსის მოწევა გადავწყვიტეთ. ჰოდა, ჩემი ბიძაშვილი, გოგი ანდრონიკაშვილი იდგა ჩემ წინ და უცბად სახე აერია – თურმე, დედაჩემი მოდის. ზურგის მხრიდან მომიახლოვდა და მხარზე ხელი დამადო. მე მაშინვე გადავაგდე პაპიროსი. მკითხა – სადილზე მოხვალო? კი-მეთქი, ვუთხარი და ავედი სახლში. მამაჩემის სიკვდილის შემდეგ დედა ხანდახან ეწეოდა. ჩემი უფროსი ძმა თენგიზიც ეწეოდა, უკვე სტუდენტი იყო. დედამ გაუწოდა პაპიროსი თენგიზს და მერე მე გამომიწოდა. მე ვუთხარი: დედა, მე არ ვეწევი-მეთქი. მე ხომ ვნახე, რომ ეწევიო. არ ვეწევი! – გავუმეორე და ამის შემდეგ მართლაც არასდროს მომიწევია.

– დაახასიათეთ საკუთარი თავი.

– როგორ გითხრათ... ცოტა აგზნებული ვარ ხანდახან, თუ რაღაც მოხდა. ისე, პრინციპში, მაინც ვიცავ ხოლმე წონასწორობას.

– ყველაზე სასაცილო და არარეალური, რაც საკუთარ თავზე გსმენიათ.

– ყველაზე სასაცილო და არარეალური, რაც ჩემს თავზე მსმენია, იყო ის, რომ მე ვიყავი კრემლის აგენტი, სუკის აგენტი და ასე შემდეგ (იცინის).

– სწორი არჩევანი გააკეთეთ ცხოვრებაში?

– მე მგონი, კი.

– როგორი ჰგონიხართ ხალხს და სინამდვილეში როგორი ხართ?

– გაწონასწორებული ვარ, მაგრამ, ვინ როგორ ფიქრობს ჩემზე, რა ვიცი.

– გაინტერესებთ, რას ფიქრობენ თქვენზე?

– რა თქმა უნდა, მაინტერესებს.

– ვინ გინდოდათ, გამოსულიყავით?

– ბავშვობაში ძალიან მინდოდა რომ ვყოფილიყავი მეტყევე – რომანტიკულად მეჩვენებოდა ეს პროფესია. მამაჩემი იყო მონადირე და, ვფიქრობდი, რომ, კარგი იქნებოდა მეც მენადირა და ვყოფილიყავი ტყეში.

– რა მოგწონთ და რა არ მოგწონთ საკუთარ თავში?

– ბევრი რამე არ მომწონს საკუთარ თავში... უმეტესად, არ მომწონს (იცინის).

– ყველაზე დიდი სისულელე, რაც ცხოვრებაში ჩაგიდენიათ.

– ცხოვრების განმავლობაში იმდენი სისულელე ჩავიდინე, რომელი გამოვყო, არ ვიცი.

– ყველაზე მეტად გიყვართ...

– ყველაზე მეტად მიყვარს ჩემი შვილები.

– რომელ ეპოქასა და ცივილიზაციაში ისურვებდით ცხოვრებას და რას გააკეთებდით?

– არა, მე არ ავირჩევდი. იმ ეპოქაში ვიცხოვრებდი, რომელშიაც ვიცხოვრე. ჩემს ადგილას ვარ.

– როდის გრძნობთ თავს უხერხულად და როგორი ხართ ამ დროს?

– უხერხულად ვგრძნობ თავს, როცა რაღაცა კონფლიქტი ხდება ხოლმე, თუმცა, უნდა გითხრათ, რომ ეს ძალიან იშვიათად ხდება.  ამ დროს უფრო მეტად თავშეკავებული ვარ, თუმცა, ხანდახან ვბრაზდები.

– საერთოდ, ფიცხი ხართ?

– ხანდახან ფიცხი ვარ.

– როგორი ხართ გაბრაზებული?

– გაბრაზებული ვარ ძალიან მკაცრი და კატეგორიული.

– რა შემთხვევაში კარგავთ თავს?

– ერთხელ ერთი დეპუტატი სიტყვიერად შეეხეო დედაჩემს და მამაჩემს და მე ის ვცემე.

– გეშინიათ...

– არაფრის არ მეშინია.

– გინდათ...

– მინდა, კარგი ფილმი გადავიღო კიდევ...

– მოგწონთ...

– ჩემი მეუღლე (იცინის).

– გაღელვებთ...

– დღევანდელი სიტუაცია საქართველოში.

– გაშფოთებთ...

– დღევანდელი სიტუაცია საქართველოში! 

– კომფოტულად მაშინ გრძნობთ თავს, როცა...

– კომფორტულად მაშინ ვგრძნობ თავს, როცა ვიღებ ფილმს. 

– ხშირად დამთვრალხართ? როგორი ხართ ამ დროს?

– არა, მე საერთოდ ცოტას ვსვამ და არ ვარ ამ დროს მოჩხუბარი, უფრო, ვმღერით და ვმხიარულობთ ხოლმე.

– როგორ გამოიყურება თქვენი ოთახი მაშინ, როდესაც არავის ელით?

– ჩემი ოთახი სულ არეულ-დარეულია და ჩემი მეუღლე სულ ალაგებს.

– ვის ეკუთვნოდა რჩევა, რომელიც ცხოვრებაში     გამოგადგათ და როგორი იყო მისი შინაარსი?

– დედას. მან მითხრა, რომ, ვიცხოვრო წესიერად, აუცილებლად გამოვადგე ადამიანებს და მაშინ ვიგრძნობ თავს ბედნიერად, – ასე დამიბარა დედამ, – წიგნზე წარწერა გამიკეთა.

– ცხოვრებამ მასწავლა რომ...

– ცხოვრებამ მასწავლა რომ, ვეცადო, ვიყო კეთილი ადამიანი.

– გინდათ ყველამ იცოდეს, რომ...

– ასე არ არის ცხოვრებაში, მაგრამ, მაინც ეცადონ, რომ ბევრი სიკეთე აკეთონ.

– რისთვის ღირდა ცხოვრება?

– ცხოვრება საერთოდ ღირს იმ შემთხვევაში, თუ მუშაობ  და აკეთებ კეთილ საქმეს.

– რა გიქმნით დისკომფორტს?

– დისკომფორტს მიქმნის ადამიანების ცუდი ყოფაქცევა.

– რას არ გააკეთებთ არასდროს, რამდენი ნულით დაბოლოებული თანხაც არ უნდა შემოგაძლიონ?

– ბევრ რამეს, მაგალითად, არასოდეს არ მოვკლავ ადამიანს.

– რაზე არ ამბობთ არასდროს უარს?

– არასდროს არ ვამბობ უარს კარგ სცენარზე.

– რა მიგაჩნიათ საკუთარ მიღწევად?

– რამდენიმე ფილმი, რომლებიც მაყურებელს მოსწონს და მე ეს მახარებს. ესენია: „არაჩვეულებრივი გამოფენა”, „შერეკილები”, „სამანიშვილის დედინაცვალი” და „ცისფერი მთები”. განსაკუთრებით – „ცისფერი მთები.” მე ყველა ეს ფილმი მიყვარს, მაგრამ, მაყურებელს განსაკუთრებით უყვარს „ცისფერი მთები”. წელს იყო კანში, შემდეგ იყო ამერიკაში, მერე კი – უკრაინაში, სადაც პრიზი მიიღო.

– ყველაზე ჭკვიანური გადაწყვეტილება, რაც კი ოდესმე მიგიღიათ.

– ყველაზე ჭკვიანური გადაწყვეტილება ჩემს ცხოვრებაში იყო ის, რომ ცოლად შევირთე ნელი.

– რითი ხართ მდიდარი?

– მდიდარი ვარ სულიერებითა და მიზნებით.

– რელიგიური ადამიანი არის...

– ღვთის მოშიში, წესიერი ადამიანი.

– სხვა რელიგიის წარმომადგენელი რომ შეგყვარებოდათ და მას არ მოენდომებინა რელიგიის შეცვლა, როგორ მოიქცეოდით?

– ეგეთი მომენტი არ ყოფილა ჩემს ცხოვრებაში. ალბათ, ბედს შევურიგდებოდი. ორივე ჩვენს რელიგიაზე დავრჩებოდით და ოფიციალურად არ ვიქორწინებდით. 

– როგორი წარმოგიდგენიათ საკუთარი თავი სიბერეში?

– უნდა ვიყო კეთილი.

– რას დაწერენ თქვენზე 22-ე საუკუნეში?  

– ოცდამეორე საუკუნეში ჩემზე დაწერენ, შერეკილი იყოო (იცინის)... შერეკილი ვარ ნამდვილად.