კითხვა: მე ჩემს თავს არ მივიჩნევ წმინდა ზიარების ღირსად და ამიტომ მხოლოდ ერთხელ ვეზიარები წელიწადში. სწორად ვიქცევი თუ არა?

პასუხი: ვართ თუ არა წმინდა ზიარების ღირსნი, ამის მსაჯულად დადგენილნი არიან მღვდელმსახურნი აღსარების საიდუმლოს პროცესში. ამიტომ, ვინც თვითნებურად აყენებენს თავს ზიარების მიღმა, არასწორად იქცევა და წარმართსა და ერეტიკოსს ემსგავსება.

კითხვა: უნდა მოინათლოს თუ არა ადამიანი ხელმეორედ, როდესაც ის რომელიმე სექტიდან ისევ მართლმადიდებელ ეკლესიას უბრუნდება?

პასუხი: ნათლობა მხოლოდ ერთხელ ხდება. რომელიმე სექტიდან დაბრუნებული ადამიანი სასჯელად იღებს ეპიტიმიას. ამ საკითხს უკეთესად გადაჭრის მისი მოძღვარი.

კითხვა: სიზმარში ძალიან ხშირად ვნახულობ ეკლესიას, ხატებს და სანთლებს. რაზე მიუთითებს ჩემი სიზმრები?

პასუხი: ეკლესიის წმიდა მამები გვირჩევენ, სიფრთხილით მოვეკიდოთ სიზმრებს. მით უფრო, თქვენი სიზმრების გამო შესაძლოა, ხიბლში ჩავარდეთ და საკუთარ თავზე აღმატებული წარმოდგენა შეგექმნათ. ამიტომ, აჯობებს, ცხადში მიეახლოთ ეკლესიას, აანთოთ სანთლები ხატებთან – იცხოვროთ ეკლესიურად, თქვათ აღსარება და ეზიაროთ.

კითხვა: არსებობს თუ არა მისალმების წესი?

პასუხი: თუ დაელოდებით, რომ შემხვედრმა მოგცეთ სალამი და შემდეგ თქვენ უპასუხოთ – ეს ქედმაღლობისა და პატივმოყვარეობის ნიშანია. ეცადეთ, პირველი მიესალმოთ მტერსაც და მოყვარესაც.