მსგავსება
უნივერსიტეტთან შემხვდა გალაკტიონი, გამაჩერა და მითხრა:
– ჯანსუღ, ნიკოლაი ეჟოვი თუ გაგიგონია?
– კი, როგორ არა, გამიგონია.
– ანდრეი ვიშინსკი?
– ვიშინსკიც გამიგონია...
– ლავრენტი ბერიაც?
– დიახ, ლავრენტი ბერიაც...
– ჰო და თუ დაკვირვებიხარ, რავა სტალინის კიტელებივით ჰგვანან ერთმანეთს?
ამ მსგავსებას მე არასოდეს დავკვირვებივარ, თუმცა გალაკტიონისა კი ძალიან გამიკვირდა და ცოტა ჩამაფიქრა ნათქვამმა, სულაც იმიტომ, რომ მაშინ 1956 წელი იყო – მარტი თუ აპრილი...
ჯანსუღ ჩარკვიანის მოგონებებიდან