2-დან 10 დეკემბრის ჩათვლით, თბილისის სამედიცინო უნივერსიტეტში ჩატარდება ფესტივალი „ნიღაბი”, რომლის ორგანიზატორიცაა მოყვარულ სტუდენტურ თეატრთა ასოციაცია – „ასტა”. ეს ორგანიზაცია სამი წლის წინ ჩამოყალიბდა. მათივე თაოსნობით, 2012 წელს პირველად ჩატარდა ფესტივალი „ნიღაბი”.

ამ ფესტივალის ფარგლებში სტუდენტური თეატრალური დასები წარადგენენ თავიანთ სპექტაკლებს. პირველი  და მთავარი წესი ამ ფესტივალისა არის ის, რომ მისი ყველა მონაწილე სტუდენტია. ამ პროექტში საქართველოში არსებული უმაღლესი სასწავლებლების უმრავლესობაა ჩართული ბათუმიდან, ქუთაისიდან, თბილისიდან და სხვა ქალაქებიდან. გარდა ამისა, „ნიღაბში” მონაწილეობენ აზერბაიჯანის, თურქეთის, უკრაინისა და აზიური დასები. ამ სტუდენტურ თვითშემოქმედებას აფასებენ პროფესიონალი მსახიობები და რეჟისორები, ანუ, პროფესიონალი ჟიური, რომელიც გამოავლენს არა გამარჯვებულ უნივერსიტეტს ან სპექტაკლს, არამედ, 9 სხვადასხვა ნომინაციაში გამარჯვებულ სტუდენტს. ასევე, ორგანიზაცია „ასტას” დაწესებული აქვს პრიზი – „ასტას რჩეული”, რომელიც, ასევე, გადაეცემა გამარჯვებულს. „ასტას” ბევრი ორგანიზაცია უდგას მხარში, რომლებიც სხვადასხვა ნომინაციაში დააჯილდოებენ გამარჯვებულებს.