კითხვა: ცოდვაა თუ არა სხვის ცოდვებზე საუბარი?

პასუხი: სხვისი ცოდვების განხილვას უნდა მოვერიდოთ. ვიფიქროთ საკუთარ ცოდვებზე. წმიდა მამათა გადმოცემით, ვინც სხვის ცოდვებს დაფარავს, უფალი მის ცოდვებს დაფარავს.

კითხვა: ძალიან მიჭირს წყენის დათმენა – ვფიქრობ, რომ ამას დაუმსახურებლად ვიღებ. როგორ მოვიქცე?

პასუხი: ფრთხილად იყავით, ამპარტავნების ცოდვაში არ ჩავარდეთ. როცა გაწყენინებენ, გაიხსენეთ, როგორ აწყენინებდნენ მაცხოვარს და როგორ მიიყვანეს სიკვდილის პირას ტანჯვით, ის კი ჯვარცმული ამბობდა: „უფალო, შეუნდევ მათ, რამეთუ არა უწყიან, რას იქმან.”

კითხვა: როგორ დავიზღვიოთ თავი ცდუნებებისგან?

პასუხი: იმას კი ნუ მიაქცევთ ყურადღებას, რას სჩადიან სხვები (როგორებიც არ უნდა იყვნენ ისინი), არამედ, ყური უგდეთ, რას გვასწავლის სიტყვა უფლისა – სახარება. მიბაძეთ მაცხოვარსა და წმიდა მოციქულების მიწიერ ცხოვრებას. სმენა და მზერა მოარიდეთ უკეთურებას და მეტი დრო დაუთმეთ ოჯახს (თუ იქ არ ბუდობს ცდუნებანი).

კითხვა: როგორც ვიცი, ნათლობის დროს ადამიანს ყველა ცოდვა მიეტევება და, მაინც უნდა მოვინანიოთ თუ არა ნათლობამდე ჩადენილი მძიმე ცოდვები (მაგალითად, აბორტი)?

პასუხი: ნათლობამდე ჩადენილი მცირედი ცოდვების მონანიება არ არის აუცილებელი, მაგრამ, თუ განსაკუთრებულად მძიმე ცოდვები აქვს ადამიანს ჩადენილი, უნდა მოინანიოს მოძღვართან.