ქათამი სოკოთი
საჭირო ინგრედიენტები: 500 გრამი ქათმის ფარში, 300 გრამი ნებისმიერი სოკო, 2 კუნწულა ყვავილოვანი კომბოსტო, 50 გრამი მაგარი ყველი, 2-3 სადილის კოვზი 16-პროცენტიანი ნაღები, 1 სადილის კოვზი მაიონეზი, 1 ცალი კვერცხი, 1 ნაჭერი რუხი პური, ცოტა მწვანილი, 2 თავი ხახვი, შავი პილპილი, სუნელი და მარილი – გემოვნებით, ზეთი.
მომზადების წესი: ხახვი დაჭერით ძალიან წვრილად, პური დაამტვრიეთ და დაალბეთ ნაღებში, ხახვის მხოლოდ ნახევარი მოშუშეთ ზეთში და დარჩენილ უმ ხახვთან ერთად შეურიეთ ფარშს. დაუმატეთ ნაღებში დამბალი პური, მარილი, შავი პილპილი, დანაყილი ნიორი და სუნელი. ეს ყველაფერი კარგად ამოურიეთ და 30 წუთით შედგით მაცივარში. ყვავილოვანი კომბოსტო მოწალეთ (ცოტათი უმი უნდა დარჩეს). სოკო დაჭერით და მოშუშეთ, უყავით ცოტა მარილი და პილპილი, გააცივეთ და დაუმატეთ ყვავილოვანი კომბოსტო, რომელსაც წინასწარ დააქუცმაცებთ. შეურიეთ გახეხილი ყველი და კარგად ამოურიეთ. რამდენიმე ფენა ფოლგით გააკეთეთ ოთხი პატარა ფიალა და ფსკერზე წაუსვით ცოტა ზეთი. ფარში გაყავით 4 ტოლ ნაწილად, გააკეთეთ მისგან ბურთულები, მოათავსეთ ფოლგის ფიალებში და ხელით ჩააბრტყელეთ. „ფიალები“ დააწყვეთ გამოსაცხობ ტაფაზე. ნაღები, რომელშიც პური იყო ჩამბალი, გაწურეთ დოლბანდში; დაუმატეთ კვერცხი, მაიონეზი და მწიკვი მარილი და კარგად ათქვიფეთ. დაუმატეთ ცოტა გახეხილი ყველი და ამოურიეთ. მიღებული მასა მოასხით ფარშს და გამოაცხვეთ 200 გრადუსზე, 20 წუთის განმავლობაში. გამოიღეთ, გააცივეთ, შემოაცალეთ ფორმა და მიირთვით კარტოფილის პიურესთან ერთად.