იმასთან შედარებით, რაც ადრე იყო, სურსათის ეროვნული სააგენტო ლამის კოსმოსური სიჩქარით აქტიურობს. ჰოდა, ამ თუ სხვა მიზეზით, გასულ კვირას სააგენტოს იმერეთის რეგიონული სამმართველოს სპეციალისტებმა სოფელ გეგუთში მდებარე ერთ-ერთი ღია სააქციო საზოგადოების სასადილოში 655 კგ დაუდგენელი წარმომავლობის ხორცი აღმოაჩინეს. როგორც ოფიციალურად იტყობინებიან, ხორცს არ ახლდა ვეტერინარული მოწმობა – „ფორმა N24.”

რაკი ხსენებული ღია სააქციო საზოგადოება ბიზნესოპერატორად რეგისტრაციის გარეშე საქმიანობდა , კომპანია, საქართველოს კანონის შესაბამისად, 500 ლარით და დამატებით 1 000 ლარითაც დააჯარიმეს იმის გამო, რომ ვეტერინარული მოწმობის გარეშე ყიდდა ხორცს (იაფად გამოვიდნენ!). ამ ჯერზე გაურკვეველი წარმომავლობის ხორცი განადგურდება, ხოლო თავად ეს ფაქტი მოწმობს, რომ ჩვენს რეალობაში საკაცობრიო კითხვას: „ყოფნა – არყოფნა, საკითხავი, აი, ეს არის“, დაემატა არანაკლებ საჭირბოროტო: „ჭამა – არჭამა, საკითხავი, აი, რა არის“!