„დავეწიოთ და გავუსწროთ აშშ-ს“

სულ ახლახან რფ-ში საზოგადოებრივი აზრის შემსწავლელი ცენტრის გამოკითხვა ჩატარდა – ფედერაციის 42 სუბიექტში, ცდომილებით, მაქსიმუმ, 3-4 პროცენტი, რის მიხედვითაც გაირკვა, რომ, რუსეთის მოსახლეობის აზრით, მათი ქვეყანა ბევრ რამეში სჯაბნის და უსწრებს დასავლეთს.
სახელდობრ, გამოკითხულთა 68 პროცენტის აზრით, მხოლოდ რუსეთშია შესაძლებელი ადამიანებთან გულღია საუბარი და მხოლოდ 8 პროცენტს მიაჩნია, რომ ამისთვის საუკეთესო ადგილი დასვლეთია.
რესპონდენტთა 53 პროცენტი დარწმუნებულია, რომ რფ-ში გაცილებით მეტი შესაძლებლობაა ბავშვების სწორად აღზრდისა  და მათი მავნე გავლენებისგან დაცვისთვის.
51 პროცენტს ჰგონია, რომ რუსეთში უსაფრთხოების უფრო მაღალი ხარისხი და ხარისხიანი პროდუქტებია. იგივე პროცენტი დარწმუნებულია, რომ, ისე ცხოვრობენ, როგორც მოესურვებათ.
მეტიც, რესპონდენტთა ნახევარს ღრმად სწამს, რომ რუსეთში ეკოლოგიური პირობებიც უკეთესია, თავისუფალი დროის საინტერესოდ გატარების საშუალებაც დასავლელებზე მეტი აქვთ, შესაფერისი სამუშაოს პოვნისა და საუკეთესო განათლების მიღების შესაძლებლობა ხომ, ჰქონიათ და ჰქონიათ.
სავსებიც ბუნებრივია, გემოვნებაზე არ დაობენ და არც იმაზე, „ოღონდ მჯეროდეს მე ჩემი ბოდვა და სიყვარულის დღესასწაული.“