გარემოსა და ბუნებრივი რესურსების დაცვის მინისტრის მოადგილე ზურაბ კოპაძე 1980 წლის  12 აპრილსაა დაბადებული. უმაღლესი განათლება, თავდაპირველად, 1996-2000 წლებში საქართველოში, კერძოდ, თსუ-ს საერთაშორისო ბიზნესის ფაკულტეტზე მიიღო (ბაკალავრიატის საფეხური), შემდგომ კი, 2009-2011 წლებში, უკრაინაში,  კიევის  ადამიანური  რესურსების  მართვის  საერთაშორისო აკადემიაში (ადამიანური  რესურსების  მართვა – მაგისტრის საფეხური). მისი სამუშაო გამოცდილება 2000  წელს იწყება საქართველოში „ფილიპ მორისის“  ოფიციალურ წარმომადგენლობაში; 2002 წლამდე იყო „ომეგას“ გაყიდვების მენეჯერი; 2002 წელს ტურისტული კომპანია „პიკნიკი“ დააფუძნა და 2003 წლამდე მის მენეჯერადაც იმუშავა; 2003 წელს საქართველოში „მარსის“ ოფიციალურ წარმომადგენლობაში გადაინაცვლა, ასევე, გაყიდვების მენეჯერად. შემდეგ წლებში მის საქმიანობაში წყვეტაა, თუმცა 2009 წელს შპს „იკა “ დააფუძნა, რომლის დამფუძნებელი დღემდე არის. 2011 წლიდან დღემდე „ბარამბო 2010-ის“ დამფუძნებელიცაა, ხოლო 2012 წელს გადამზიდი კომპანია შპს „ტრანსპორტერი“ და „ნატახტარი 2012“ დაააფუძნა და დღემდეც არის მათი დამფუძნებელი. ამის პარალელურად, 2005 წლიდან 2013-მდე „ნატახტარი 2005-ის“ აღმასრულებელ დირექტორადაც იმუშავა, ვიდრე 2014 წელს გარემოსა და ბუნებრივი რესურსების დაცვის მინისტრის მოადგილედ არ დაინიშნა.

მისი ოფიციალური ბიოგრაფია გვამცნობს, რომ ბ-ნი კოპაძე გახლავთ შავი ქამრის მფლობელი, რომელიც მას ევროპის ტაეკვანდოს ფედერაციის ტექნიკურმა დირექტორმა მიანიჭა. აქედან გამომდინარე, 1996-2001 წლებში იყო ტაეკვანდოში საქართველოს ნაკრების წევრი და კაპიტანი და საქართველოს მრავალგზის ჩემპიონიც. 2009-2012 წლებში – საქართველოს ტაეკვანდოს ფედერაციის ვიცე-პრეზიდენტი, ხოლო 2012-2013 წლებში, საერთოდაც, საქართველოს ტაეკვანდოს ფედერაციის პრეზიდენტი.

ზურაბ კოპაძემ თავისი პირველი და ჯერჯერობით ბოლო დეკლარაცია 2014 წელს შეავსო და ოჯახის წევრებად მიუთითა: მეუღლე, 1981 წელს დაბადებული ნინო ასათიანი და, ორი შვილი: 2010 წელს დაბადებული ნოდიკო და 2011 წელს დაბადებული საბა.

ოჯახში უძრავ ქონებას მხოლოდ მინისტრის მოადგილე ფლობს. ზურაბ კოპაძის საკუთრებაა: საცხოვრებელი ბინა თბილისში, ჭავჭავაძის გამზირზე, რომლის ფართობიც, დეკლარაციის თანახმად, 156 000 კვ. მეტრია, რაც, სავარაუდოდ, შეცდომაა; ასევე, იმავე მისამართზე მდებარე მეორე ბინა, რომლის ფართობადაც მითითებულია 98 000 კვ. მეტრი და სამი 15-15 კვ. მ. ფართობის ავტოფარეხი.

რაც შეეხება მოძრავ ქონებას: ზურაბ კოპაძეს ორი ავტომანქანა ჰყავს: 2009 წლის MERSEDES-BENC და 2005 წლის HAMERI H3, ნინო ასათიანის საკუთრება კი გახლავთ 2004 წლის MERSEDES-BENC CEELKA.

დეკლარაციის შევსების დროს ნაღდი ფული მხოლოდ ზურაბ კოპაძეს ჰქონდა – 13 000 ლარი. რაც შეეხება სამეწარმეო საქმიანობას და აქედან მიღებულ შემოსავალს: 2013 წლის განმავლობაში ზურაბ კოპაძემ, როგორც შპს „ნატახტარი 2009-ისა“ და შპს „ნატახტარი 2012-ის“ პარტნიორმა, ვერანაირი შემოსავალი ვერ მიიღო; სამაგიეროდ, როგორც  შპს „ბარამბო 2011-ის“ პარტნიორმა, აიღო 81 000 ლარი, როგორც შპს „იკა 2009-ისა“ და  შპს „ტრანსპორტერის“ პარტნიორმა – 25 000-25 000 ლარი.

ამას გარდა, 2013 წლის განმავლობაში ზურაბ კოპაძემ, როგორც შპს „ნატახტარი 2005-ის“ აღმასრულებელმა დირექტორმა, ხელფასის სახით 142 500 ლარი მიიღო, ხოლო მისმა მეუღლემ, როგორც „რედისონ ბლუ ივერიას“ გაყიდვებისა და მარკეტინგის დირექტორმა – 45 000 აშშ დოლარი.

ზურაბ კოპაძეს 2013 წელს 50 000 ლარის ოდენობის სამომხმარებლო სესხიც აუღია.