კითხვა: როგორ შეესაბამება მცნება – „არა კაც ჰკლა!“ – მამულის დასაცავად ომში მებრძოლების საქციელს?

პასუხი: როგორც ათანასე ალექსანდრიელი წერს: „ამ ცხოვრებაში ქმედება ორადაა გაყოფილი. უჯერია კაცის კვლა, მაგრამ, ბრძოლაში მოწინააღმდეგეთა ამოწყვეტა კანონიერია და ქების ღირსია. ამიტომ, ბრძოლაში მამაცობით გამორჩეული პატივის ღირსია და მათ სახელზე მათი სიმართლის მქადაგებელი ძეგლები აღემართება“.

კითხვა:  შეუძლია თუ არა ადამიანს ეკლესიის დაუკითხავად, იტვირთოს ბერის ღვაწლი და მეუდაბნოედ განმარტოვდეს?

პასუხი: ბერული ღვაწლის ერთ-ერთი საფუძველი იერარქიისადმი მორჩილებაა. ყოველგვარი თვითნებობა ეკლესიაში უდიდეს ცოდვად ითვლება და ადამიანი მწვალებლობამდე მიჰყავს.

კითხვა: რა უმთავრესი მოვალეობა გვაკისრია გარდაცვლილი ახლობლების მიმართ?

პასუხი: გარდაცვლილი ახლობლების მიმართ თქვენი უმთავრესი მოვალეობაა ლოცვა მათი სულის საცხონებლად, მათ სახელზე მოწყალების გაღება შეჭირვებულთათვის და მათი მოხსენიება ეკლესიაში უსისხლო მსხვერპლშეწირვის დროს.

კითხვა: რომელი სახელით უნდა მოვიხსენიოთ ლოცვებში ადამიანი – ნათლობის, საერო თუ მოფერებითი?

პასუხი: ადამიანები ლოცვებში უნდა მოიხსენიოთ ნათლობის სახელით.

კითხვა: ყოველთვის სარწმუნოა თუ არა სინდისის ხმა?

პასუხი: უსათუოდ უნდა უსმინოთ სინდისის ხმას. ამ ხმით ხშირად ჩვენი მფარველი ანგელოზი მოგვმართავს.