„ფორბსის” 2014 წლის მილიარდერთა რეიტინგში 45 ადამიანი მოხვდა, რომელთა 3 პროცენტი დაუქორწინებელია. გთავაზობთ უცოლო მილიარდერთა ტოპ-ხუთეულს.

ალეხანდრო სანტო-დომინგო დავილა  (კოლუმბია) - 11,1 მილიარდი დოლარი

კოლუმბიელი მილიარდერი, 37 წლის ალეხანდრო სანტო-დომინგო დავილა ყველაზე მდიდარი უცოლო მილიარდერია. ჰარვარდის უნივერსიტეტის კურსდამთავრებული და ხელოვნების ნიმუშების კოლექციონერი, ალეხანდრო ლუდსახარშების მფლობელია. მისი ბოლო რომანებიდან კი ცნობილია მისი კავშირი მოდელებთან – ამანდა ჰერსტთან და ჯული ჰენდერსონთან.

იან კუმი  (ამერიკის შეერთებული შტატები) - 6,8 მილიარდი დოლარი

ის კიევთან ახლოს მდებარე სოფელში დაიბადა და ამერიკაში ემიგრიაციაში წასვლამდე კრივით იყო დაკავებული – 38 წლის იან კუმი რეპერ კენი უესტის მსმენელი გახდა და მისი სახელი მხოლოდ 2014 წელს გახდა ცნობილი, როცა „ფეისბუქმა” მის მიერ შექმნილი პროგრამა – „ვათსაფი” 19 მილიარდ დოლარად შეიძინა. კუმი მილიარდერების რეიტინგში დებიუტანტია.

ედუარდო სავერინი (ბრაზილია) - 4,1 მილიარდი დოლარი

„ფეისბუქის” ყველაზე იდუმალი დამაარსებელი დღემდე კომპანიის აქციების 2,2 პროცენტს ფლობს. გასულ წელს „ფეისბუქის” აქციების ფასმა 130 პროცენტით მოიმატა და 31 წლის სავერინის კაპიტალი 2 მილიარდი დოლარით გაიზარდა. ბრაზილიაში დაბადებულმა სავერინიმ 2012 წელს უარი თქვა ამერიკის მოქალაქეობაზე და ამჟამად სინგაპურში ცხოვრობს. 

რობერტ პერა (ამერიკის შეერთებული შტატები) - 2,7 მილიარდი დოლარი

35 წლის რობერტ პერა ერთწლიანი პაუზის შემდეგ დაბრუნდა „ფორბსის” რეიტინგში და კვლავ მოირგო სასურველი სასიძოსთვის განკუთვნილი ტიტული. მისი კომპანია „იუბიქუით ნეთვორქსი” უსადენო მოწყობილობების წარმოებაში ერთ-ერთი ლიდერი კომპანიაა. 

ჯეკ დორსი (ამერიკის შეერთებული შტატები) - 2,2 მილიარდი დოლარი

37 წლის მილიარდერი ჯეკ დორსი სერტიფიცირებული მასაჟისტია, მაგრამ ამან არ შეუშალა ხელი, რომ ერთ-ერთ ყველაზე წარმატებულ ადამიანად გამხდარიყო ამერიკაში. მისი დაარსებულია რამდენიმე წარმატებული კომპანია: მიკრობლოგების სერვისი „ტვიტერი”, რომლის აქციათა 5 პროცენტს ფლობს და მობილური გადახდის სერვისი „სქუეირი”, სადაც 29 პროცენტს ფლობს. ჯეკ დორსი ამერიკაში სასურველი სასიძოების რეიტინგის პირველ ათეულშია.