კითხვა: ტონალურ კრემს ვყიდულობ ყოველთვის მაღაზიაში და არა ბაზრობაზე, თან, არცთუ იაფს ვიხდი, მაგრამ, კანზე თანაბრად არ მესმევა და ხანდახან კანს მიღიზიანებს კიდეც. როგორ მოვიქცე?

პასუხი: ყიდვისას აუცილებლად წაიკითხეთ მისი შემადგენლობა და შეიძინეთ მხოლოდ ის ტონალური კრემი, რომელიც შედგება ნატურალური აქტიური ინგრედიენტებისგან, რომლებზეც ალერგია არ გაქვთ.

კითხვა: რა დადებითი და უარყოფითი მხარეები აქვს კანის ლაზერულ გაწმენდას?

პასუხი: ლაზერული გაწმენდის დადებითი მხარეებია: ა) მკვეთრად გამოხატული ესთეტიკური ეფექტი; ბ) ეს მეთოდი ითვლება ნაოჭებთან ბრძოლის რადიკალურ საშუალებად.

უარყოფითი მხარეები: ა) შესაძლებელია, კანის ზედაპირი გახდეს უსწორმასწორო და გაჩნდეს ნაწიბურები; ბ) ზოგჯერ, ლაზერით დამუშავებულ და დაუმუშავებელ ზონებს შორის, შესაძლოა, გაჩნდეს დემარკაციული ხაზი; გ) შეხორცების პროცესი არის მტკივნეული და ხანგრძლივი – ერთი თვე ან უფრო მეტი პერიოდი.

კითხვა: მინდა ლაზერული ლიპოსაქციის გაკეთება. მაინტერესებს, აქვს თუ არა ამ პროცედურას უკუჩვენებები?

პასუხი: როგორც წესი, ლაზერულ ლიპოსაქციას უკუჩვენებები არ ახასიათებს, თუ დაიცავთ ყველა მითითებას, რასაც ექიმი გეტყვით პროცედურის შემდეგ. არ დაგავიწყდეთ კომპრესული სახვევების გაკეთება და შეეგუეთ იმას, რომ ხანგრძლივია სარეაბილიტაციო პერიოდი – ორი კვირიდან ზემოთ.

კითხვა: როგორ კანს უხდება გარგარის ზეთი?

პასუხი: გარგარის ზეთი ნამდვილი სასიცოცხლო ელექსირია მშრალი, აქერცვლისკენ მიდრეკილი კანისთვის, მაგრამ, განსაკუთრებით ეფექტურია კანის გაუწყლოების სამკურნალოდ; ასევე, კარგად „მუშაობს“ მაკიაჟის მოსახსნელი საშუალებების შემადგენლობაშიც.