2014 წლის რეიტინგში, რომელიც 3 მარტს გამოქვეყნდა, 1 645 ადამიანი მოხვდა, რომელთა ქონება ერთ მილიარდ ამერიკულ დოლარს აღემატება. მილიარდერების საერთო კაპიტალი 6,4 ტრილიონ ამერიკულ დოლარს შედაგენს, რაც ერთი ტრილიონით მეტია გასულ წელთან შედარებით. ახალ რეიტინგში რეკორდულად ბევრი „ახალწვეულია” – 268 და მათ შორის – 42 ქალი. სულ კი მილიარდერთა რეიტინგში 172 ქალია, რაც, ასევე, სარეკორდო მაჩვენებელია. რეიტინგის ყველაზე მეტი წევრი ამერიკის შეერთებულ შტატებში ცხოვრობს – 492 მილიარდერი, 152 მილიარდერს კი ჩინეთის პასპორტი აქვს. წელს მილიარდერთა რეიტინგში დებიუტი აქვთ ალჟირელ, ლიტველ, ტანზანიელ და უგანდელ მილიარდერებს. პირველი ათეული კი ასე გამოიყურება.

ბილ გეითსი (ამერიკის შეერთებული შტატები) – 76 მილიარდი დოლარი; „მაიკროსოფტი”

ოთხწლიანი პაუზის შემდეგ, ბილ გეითსმა დაიბრუნა ლიდერობა მილიარდერთა რეიტინგში, სულ კი, უკანასკნელი 20 წლის განმავლობაში, ის მეთხუთმეტედ უდგას სათავეში „ფორბსის” სიას. 

კარლოს სლიმ ელუ (მექსიკა) – 72 მილიარდი დოლარი; ტელეკომუნიკაცია

მექსიკელი მედიამაგნატის ოთხწლიანი ჰეგემონია დასრულდა, წინა წელთან შედარებით მისი კაპიტალი კი ერთი მილიარდი დოლარით შემცირდა.

ამანსიო ორტეგა (ესპანეთი) – 64 მილიარდი დოლარი; „ინდიტექსი”

„ზარასა” და სხვა ცნობილი ბრენდების მფლობელი გასულ წელთან შედარებით 7 მილიარდით გამდიდრდა და ამჟამად ის ყველაზე მდიდარი ევროპელის სტატუსს ინარჩუნებს.

უორენ ბაფეტი (ამერიკის შეერთებული შტატები) – 58,2 მილიარდი დოლარი; „ბერკშაირი”

83 წლის „ომაჰელი ორაკული” კვლავ ფორმაშია და მსოფლიოს ერთ-ერთი ყველაზე გავლენიანი ინვესტორის ტიტულს ატარებს.

ლარი ელისონი (ამერიკის შეერთებული შტატები) – 48 მილიარდი დოლარი - „ორაკლი”

„სოფტ კორპორაციის” დამფუძნებელი და მფლობელი ლარი ელისონი 2013 წელთან შედარებით 7 მილიარდი დოლარით გამდიდრდა.

ჩარლზ კოხი (ამერიკის შეერთებული შტატები) – 40 მილიარდი დოლარი; „კოხ ინდასტრისი”

1967 წლიდან ჩარლზ კოხი სათავეში უდგას „კოხ ინდასტრისს” და ამ პერიოდის განმავლობაში კონგლომერატი მეგამომგებიან ბიზნესად ყალიბდება, რაც მისი მფლობელის კაპიტალზე აისახება.

დევიდ კოხი (ამერიკის შეერთებული შტატები) – 40 მილიარდი დოლარი; „კოხ ინდასტრისი”

ძმასთან, ჩარლზთან ერთად, დევიდ კოხი მსოფლიოში ყველაზე მდიდარ საოჯახო კომპანიას ხელმძღვანელობს.

შელდონ ადელსონი (ამერიკის შეერთებული შტატები) – 38 მილიარდი დოლარი; სათამაშო ბიზნესი

ამერიკელი მილიარდერი 2013 წელს დღე-ღამეში 32 მილიონ დოლარს გამოიმუშავებდა. 2007 წლიდან ის ტოპ-ათეულის უცვლელი წევრია.

კრისტი უოლტონი (ამერიკის შეერთებული შტატები) – 36,7 მილიარდი დოლარი; „უოლ-მარტი”

კრისტი უოლტონი მსოფლიოს უმდიდრესი ქალია. წელს მან „ლორეალის” მფლობელის, ლილიან ბეტანკურის ჰეგემონია დაამხო.

ჯიმ უოლტონი (ამერიკის შეერთებული შტატები) – 34,7 მილიარდი დოლარი; „უოლ-მარტი”

ჯიმ უოლტონი „უოლ-მარტის” სუპერმარკეტების ქსელის დამაარსებლის, სემ უოლტონის უმცროსი ვაჟია, რომელიც მეათე პოზიციას ამაგრებს „ფორბსის” რეიტინგში.