კითხვა:  გთხოვთ მაცნობოთ  არასრულწლოვან მსჯავრდებულს სასჯელის სახით შეფარდებული თავისუფლების აღკვეთისას, სასჯელის მოხდიდან რა ვადებში უნდა მოეხსნას ნასამართლეობა?

პასუხი: გაცნობებთ, რომ  იმას, ვინც დანაშაული თვრამეტ წლამდე ჩაიდინა ნასამართლეობა გაუქარწყლდება და მოეხსნება ნაკლებად მძიმე დანაშაულისათვის თავისუფლების აღკვეთით მსჯავრდებისას – სასჯელის მოხდიდან ერთი წლის შემდეგ; მძიმე დანაშაულისთვის თავისუფლების აღკვეთით მსჯავრდებისას – სასჯელის მოხდიდან სამი წლის შემდეგ  და განსაკუთრებით მძიმე დანაშაულისთვის თავისუფლების აღკვეთით მსჯავრდებისას – სასჯელის მოხდიდან ხუთი წლის შემდეგ.

კითხვა: გთხოვთ, მაცნობოთ,  რა შედეგი მოჰყვება არასრულწლოვანისთვის დანიშნული აღმზრდელობით ზემოქმედების იძულებითი ღონისძიების დარღვევას?

პასუხი: გაცნობებთ, რომ თუ არასრულწლოვანი სისტემატურად არღვევს აღმზრდელობითი ზემოქმედების იძულებითი ღონისძიებით გათვალისწინებულ პირობებს, მაშინ ეს ღონისძიება სპეციალიზებული სახელმწიფო ორგანოს წარდგინებით გაუქმდება და მასალები გადაიგზავნება არასრულწლოვნის სისხლისსამართლებრივ პასუხისგებაში მისაცემად.

კითხვა: გთხოვთ, მაცნობოთ, რას გულისხმობს აღმზრდელობითი ზემოქმედების იძულებითი ღონისძიების, გაფრთხილების გამოყენება არასრულწლოვნის მიმართ? 

პასუხი:  გაცნობებთ, რომ  გაფრთხილება ნიშნავს, არასრულწლოვნისათვის იმის განმარტებას, თუ რა ზიანი გამოიწვია მისმა ქმედებამ და რა შედეგი მოჰყვება სისხლის სამართლის კოდექსით გათვალისწინებული დანაშაულის განმეორებით ჩადენას.

კითხვა:  გთხოვთ, მაცნობოთ, როგორ უნდა განხორციელდეს არასრულწლოვნის მიმართ აღმზრდელობითი ზემოქმედების იძულებითი ღონისძიების, საზედამხედველოდ გადაცემის გამოყენება?

პასუხი: გაცნობებთ, რომ საზედამხედველოდ გადაცემა ნიშნავს, მშობლისთვის ან მისი შემცვლელი პირისთვის, ანდა სპეციალიზებული სახელმწიფო ორგანოსათვის, იმ მოვალეობის დაკისრებას, რამაც აღმზრდელობითი ზეგავლენა უნდა მოახდინოს არასრულწლოვანზე და კონტროლი გაუწიოს მის ყოფაქცევას.

კითხვა: გთხოვთ, განმიმარტოთ, შეუძლია თუ არა სასამართლოს, დააკისროს  არასრულწლოვანს ზიანის ანაზღაურების მოვალეობა იმ შემთხვევაში, თუ ის არ მუშაობს ან სოციალურად დაუცველთა ოჯახიდანაა?

პასუხი: გაცნობებთ, რომ ზოგადად არასრულწლოვნისთვის ზიანის ანაზღაურების მოვალეობის დაკისრებისას, სასამართლო ითვალისწინებს მის ქონებრივ მდგომარეობას,  შესაბამის შრომით ჩვევებს და ამის გათვალისწინებით, უნიშნავს ან არ უნიშავს ზიანის ანაზღაურების მოვალეობას.