ანუ განმმუხტველები

თუმცა გასულ კვირას (სამწუხაროდ, მიმდინარეშიც) მთელი მსოფლიოს შეშფოთებული ყურადღება ყირიმისკენ იყო მიმართული, ქართველი საზოგადოების ერთგვარი განმუხტვა: ერთი მხრივ, მავანმა მსახიობმა (ოღონდ ისაა, რომ ამ კონკრეტულ შემთხვევაში: „მსახიობი“ ფრიად ხმამაღლაა ნათქვამი) ორალური სექსის ხსენებით სცადა, მავანმა ჟურნალისტმა კი სარძევე ჯირკვლების ათამაშებით; ხოლო მეორე მხრივ, ხალხის რჩეულმა ბ-ნმა ხაჩიძემ – ცოცხალი ექსპერიმენტით. 

საქმე ის გახლავთ, რომ გასულ კვირას ხალხის რჩეულმავე ვახტანგ ხმალაძემ საზოგადოებას წინა ხელისუფლების მიერ არჩევნების გაყალბების მეთოდი გაუმხილა: კერძოდ, თითქოს „კოკა-კოლა“ მარკირების სითხეს აუვნებელყოფს, რამაც მის კოლეგა გოგა ხაჩიძეს ექსპერიმენტის ჩატარების გზით ოპონენტის ბრალდების გაუვნებელყოფის იდეა გაუღვიძა.

გაუღვიძა და გადაწყვეტილებაც უმალ სისრულეში მოიყვანა: მარკირების სითხით, სანათითა და „კოკა-კოლით“ შეიარაღებულმა ბ-ნმა ხაჩიძემ ვიდეოჩანაწერში თითზე ჯერ მარკირების სითხე დაისხურა, შემდეგ თითზე დაინათა (როგორც ნამდვილ ილუზიონისტს შეჰფეროდა), ბოლოს კი, იგივე თითი „კოკა-კოლით“ სავსე ჭიქაში მოითავსა (ზედაც, „ნაციონალური“ სიტყვა მოგვცა, რომ ხელები სუფთა ჰქონდა). თუმცა, მისი ექსპერიმენტის თანახმად, „კოკა-კოლამ“ მარკირების სითხე მის თითს ვერ მოაშორა.

ბუნებრივია, ექსპერიმენტი მთლად ისეთი სიზუსტითაც არ ჩატარებულა, მის შედეგს წყალგაუსვლელის ეფექტი ჰქონდეს, თუმცა ბუნებრივად გააჩინა კითხვა: საიდან მოიპოვა რიგითმა დეპუტატმა მარკირების სითხე?! ოღონდ ხალხის რჩეულს ამ კითხვაზე პასუხი აღარ გაუცია.

ასეა თუ ისე, ბ-ნი ხაჩიძე დარწმუნებულია, რომ ბ-ნი ხმალაძე ერთხელ და სამუდამოდ ამხილა, მაგრამ, თუ გავიხსენებთ, რამდენი იწვალა (ექსპერიმენტის ჩატარება მაქვს მხედველობაში), არ ჯობდა, პირდაპირ ეთქვა, ის ოხერი არჩევნები როგორ ყალბდებოდა (ხელის დასველებაც კი არ მოუწევდა)?!