„გული მოგიკალიო“

შესაძლოა, იმიტომ, რომ ცნობილი ყოფითი ჭეშმარიტების თანახმად, „ჩემი შენ გითხარი, გული მოგიკალი“, აწ ერთადერთი და განუმეორებელი (საპარლამენტო ოპოზიციური განხრით) „ნაციონალური მოძრაობის“ წევრები აქეთ – პოლიტიკური ნიშნით დევნაზე უბნობენ, იქით – უკანონო მოსმენა-მიყურადებაზე, რაც მთავარია, ისე, რომ წამის მემილიონედითაც ვერ გრძნობენ უხერხულობას. 

მეორე მხრივ, ან კი რატომ უნდა იგრძნონ? როდესაც უკანონო მოსმენა-მიყურადებისა და პოლიტიკური დევნის გამო არავისთვის ბუზიც არ აუფრენიათ (მხოლოდ კოაბიტაციურ მტრედებს აფრენენ).

სავარაუდოდ, ზემოხსენებული მტრედების ეშხით, გასულ კვირას ოპოზიციონერმა გიორგი ვაშაძემ მობილური ტელეფონი, რომელიც ხელთ ეპყრა, ზეაღმართა და რიტორიკულად ბრძანა: „დღეს ორჯერ მეტს გვისმენენ“. ბუნებრივია, ამ პათეტიკური რეპლიკის არსი ის იყო, „ორივენი (ახალი და ძველი ხელისუფლებაც) ბედკრული საქართველოს შვილები ვართო“, თუმცა, თავისთავად იმასაც ნიშნავს, რომ ძველები ახლებზე, მართალია, ორჯერ ნაკლებს, მაგრამ მაინც უსმენ-აყურადებდნენ (ბ-ნი ვაშაძის ვერსიით).

ხოლო, თუ გავიხსენებთ, რომ პირველებს ეს ამბავი ხახვივით შერჩათ, ვითომ მეორეებს რატომ არ უნდა შერჩეთ?!