თანამედროვე ნორმების მიხედვით, კალორიების საშუალო დღეღამური ნორმა ქალებისთვის შეადგენს 1 800-2 000 კილოკალორიას, მისი ფიზიკური დატვირთულობის გათვალისწინებით. შესაბამისად, წონაში დაკლების სურვილის შემთხვევაში, თანაც ისე, რომ ორგანიზმი არ გამოიფიტოს და დასუსტდეს, მან უნდა მიიღოს დღეში 1 400-1 600 კილოკალორია. ზოგს, შეიძლება, ეს ცოტა მოეჩვენოს, მაგრამ, უმჯობესია, სასურველ შედეგს მივაღწიოთ ნელი ნაბიჯით და წონის აღდგენის საშიშროების გარეშე.

სითხე

ზოგადად, სითხის მიღების საშუალო ნორმაა 1,5-დან 2 ლიტრამდე, ხოლო, თუ მიმდინარეობს გახდომის პროცესი, მაშინ – უფრო მეტიც. მაგრამ, წყლის რაოდენობის გაზრდა უნდა მოხდეს მხოლოდ ექიმ-დიეტოლოგის რჩევით, რომელიც გაითვალისწინებს თქვენი ჯანმრთელობის მდგომარეობას.

გახსოვდეთ: წყალი ერთნაირი რაოდენობით უნდა სვათ წლის ნებისმიერ დროს (ზოგიერთს ჰგონია, რომ ზამთარში ნაკლები სითხის მიღებაა საჭირო, რაც არასწორია). გარდა ამისა, უმჯობესია, სვათ ჩვეულებრივი სასმელი წყალი ან ხილისა და ბალახების (ან – მწვანე) ჩაი უშაქროდ.

მენიუ

პროდუქტები იყოფა 4 ჯგუფად:

1. მარცვლეული და კარტოფილი.

2. თევზი, ხორცი, კვერცხი, ზღვის პროდუქტები, რძის პროდუქტები.

3. ცხიმის შემცველი პროდუქტები და შაქარი.

4. ხილი და ბოსტნეული

თქვენი დიეტოლოგის დახმარებით, ამ პროდუქტების გამოყენებით შეადგინეთ ყოველდღიური მენიუ, რომელშიც გათვალისწინებული იქნება თითოეული კომპონენტის ენერგეტიკული ღირებულება, რათა არ გადააჭარბოთ კალორიების დღიურ ნორმას.

მოვათვინიეროთ მადა

ამისთვის საჭიროა, შევიმუშაოთ კვების რეჟიმი. როგორც მეცნიერები ამტკიცებენ, დღის პირველ ნახევარში საკვებისგან მაქსიმალურად თავის შეკავება გვიბიძგებს დღის მეორე ნახევარში ზომაზე მეტის ჭამისკენ. ამიტომ, მკაცრად უნდა დაიცვათ კვებასა და კვებას შორის შუალედების ხანგრძლივობა – 3-4 საათი და მაქსიმალურად შეეცადეთ, რომ ყოველდღე ზუსტად ერთსა და იმავე საათზე მიირთვათ.

თუ ისე მოხდა, რომ ამ 3-4 საათის განმავლობაში ძალიან მოგშივდათ, დალიეთ 1 ჭიქა უშაქრო მწვანე ჩაი (ცივი ან ცხელი, მნიშვნელობა არ აქვს), ან, მიირთვით უმი კომბოსტოს 1-2 ცალი ფოთოლი, 1 ცალი ბულგარული წიწაკა, 1 ცალი ვაშლი ან 1 ჭიქა უცხიმო მაწონი (ცხადია, ამ პროდუქტებიდან ერთ-ერთი, და არა ყველა ერთად).

შიმშილის დასაოკებლად არსებობს სპეციალური ვარჯიშიც: დადექით სწორად. შესუნთქვისას გამოზნიქეთ მკერდი და შეისუნთქეთ მუცელი; ამოსუნთქვისას კი პირიქით – შეზნიქეთ მკერდი და მაქსიმალურად „გამობერეთ“ მუცელი. ვარჯიში გაიმეორეთ 30-40-ჯერ.

როგორ შევინარჩუნოთ შედეგი

თუ წონაში კლება ორგანიზმისთვის სტრესების გარეშე მიმდინარეობდა, ეს იმას ნიშნავს, რომ მან შეიმუშავა საკვების გადამუშავების სწორი ჩვევები და, შესაბამისად, წონის შენარჩუნებაც არ გაგიჭირდებათ, მაგრამ, ამის მიუხედავად, აუცილებლად მიაქციეთ ყურადღება კვების რეჟიმს დიეტის დასრულების შემდეგაც: მიირთვით დღეში 4-5-ჯერ, ცოტ-ცოტა და, ამასთან, მენიუში ჩართეთ დღეში 500 გრამი ცოცხალი ბოსტნეული.

წარმატებებს გისურვებთ!