კითხვა: კბილის გათეთრების რა საშუალებას შეიძლება მივმართო?

პასუხი: სახლის პირობებში არ გირჩვეთ კბილების გათეთრების მცდელობას, რადგან, შეიძლება, დაიზიანოთ კბილის მინანქარი (ემალი). მიმართეთ სტომატოლოგს. 

კითხვა: ამბობენ, რომ 1 ჭიქა წყალში გარეული 2 ჩაის კოვზი ვაშლის ძმარი წონის დაკლებას უწყობს ხელს. არის თუ არა ეს მეთოდი ჯანმრთელობისთვის უსაფრთხო?

პასუხი: თუ დარწმუნებული ხართ, რომ კუჭ-ნაწლავის მხრიდან პრობლემები არ გაქვთ, შეიძლება ყოველდღიურად, უზმოზე მხოლოდ 1 ჩაის კოვზი ვაშლის ძმრის მიღება, თანაც, არა სუფთა სახით, არამედ, უნდა გაიხსნას 1 ჭიქა (ოთახის ტემპერატურის) თაფლიან წყალში (1 ჩაის კოვზი თაფლი). არასწორი გამოყენების შემთხვევაში, შეიძლება გამოიწვიოს კუჭ-ნაწლავთა წყლულოვანი დაავადება და ღვიძლის ციროზიც კი. 

კითხვა: რომელი თვიდან რეაგირებს ბავშვი თავისი სახელის დაძახებაზე?

პასუხი: თავისი სახელის დაძახებაზე ბავშვი უფრო ხშირად რეაგირებს 7-8 თვის ასაკიდან. 

კითხვა: ჩემს 2 წლის ბიჭს ხშირად უოფლიანდება ფეხები. რა შეიძლება იყოს ამის მიზეზი? 

პასუხი: ეცადეთ, ბავშვის ფეხსაცმელი იყოს ბუნებრივი ტყავის და ჰქონდეს რამდენიმე წყვილი ხშირად გამოსაცვლელად. ხშირადვე უნდა გამოუცვალოთ მას წინდებიც. თუმცა, ფეხის ოფლიანობა შეიძლება რაიმე დაავადების სიმპტომიც იყოს.

კითხვა: მაინტერესებს, შეიძლება თუ არა, თხილეულმა გაგასუქოს?

პასუხი: თხილეული მაღალი კალორიულობით ხასიათდება, ამიტომ, მისი ჭარბი რაოდენობით მიღება გამოიწვევს როგორც წონაში მატებას, ისე საკვების მონელებასთან დაკავშირებულ პრობლემებს.

კითხვა: გამიგია, რომ გრეიპფრუტი წონაში დაკლებას უწყობს ხელს. ამ მიზნით, ერთი კვირის განმავლობაში ვაპირებ ყოველდღე თითო ცალის მიღებას და, მაინტერესებს, ჭამის წინ ვჭამო თუ ჭამის შემდეგ? 

პასუხი: ყოველი ჭამის წინ უნდა მიირთვათ ნახევარი გრეიპფრუტი – ეს დაგეხმარებათ წონაში დაკლებაში. გასათვალისწინებელია უკუჩვენებები: უკუნაჩვენებია მათთვის, ვისაც აწუხებს წყლული, გასტრიტი, კუჭის წვენის მომატებული მჟავიანობა ან კუჭ-ნაწლავის ტრაქტის სხვა პათოლოგიები. 

კითხვა: მყავს წლისა და 7 თვის გოგონა. რამდენიმე კვირაა, შევამჩნიე, რომ კბილებს აკრაჭუნებს. ერთხელ რომ დავუშალე, იმის შემდეგ, თითქოს ძალით აკეთებს. რისი ბრალი შეიძლება იყოს და მოგვიწევს თუ არა ბავშვის მიყვანა ნევროპათოლოგთან?  

პასუხი: შესაძლოა, ბავშვს კბილები ამოსდის და ამით არის განპირობებული მისი ამგვარი ქცევა, ამიტომ, ნუ გაამახვილებთ ამაზე ყურადღებას. 

კითხვა: ფეხზე, ნეკთან და ცერთან, გამომივიდა ხრტილოვანი წანაზარდები, სავარაუდოდ, პოდაგრა. როგორ შეიძლება წანაზარდის მოშორება?

პასუხი: პირველ ყოვლისა, მიმართეთ ტერფის სპეციალისტს – პოდიატრისტს, რათა დადგინდეს, ხომ არ არის აღნიშნული წანაზარდი დაკავშირებული ტერფის ორთოპედიულ პათოლოგიასთან. შეიძლება, წანაზარდის გაჩენა განპირობებული იყოს ბრტყელტერფიანობით და, მაშინ, აუცილებელი იქნება სპეციალური სუპინატორის ტარება.