კითხვა: საჭიროა თუ არა ყურების ხშირი გაწმენდა?

პასუხი: ამბობენ, ყურების ხშირი და საფუძვლიანი წმენდა სასარგებლოაო, მაგრამ ეს არ არის მართალი. ჯანმრთელი ყურები ჩვენს დაუხმარებლადაც მშვენივრად იწმინდება. სასმენი მილების თვითგაწმენდის პროცესი ხორციელდება გარეთა სასმენი მილის წინა კედელთან მდებარე საფეთქელ-ქვედა ყბის სახსრის მოძრაობით, მაგალითად, ღეჭვის, ლაპარაკის ან ხველის დროს. ყურის ნიჟარა უნდა გაიწმინდოს შიგნითა მხრიდან, მაგრამ სასმენ მილში შეძრომა სულაც არაა საჭირო.

კითხვა: ამ ბოლო დროს ყურებში შუილმა შემაწუხა და თითქოს უარესად მესმის კიდეც. რა შეიძლება იყოს ამის მიზეზი?

პასუხი: ყურების შუილს და ზარის ხმას იწვევს ყურის ანთება, გოგირდოვანი საცობები,  უცხო სხეული სასმენ მილში, სასმენი ნერვის დაზიანება, ასაკობრივი ცვლილებები. მაგრამ ხმაური ყურებში – არა მარტო ყელ-ყურ-ცხვირის ორგანოების დაავადებათა სიმპტომია, არამედ ბევრი სხვა რამეც იწვევს, მაგალითად, თავის ტრავმა, თავის ტვინის სისხლძარღვების ათეროსკლეროზი, კისრის მალების ოსტეოქონდროზი, თავის ტვინში სისხლის მიმოქცევის დარღვევა და სხვა.

კითხვა: რამდენიმე წელია, ჩემს მეუღლეს ცხვირი უწითლდება, ამას წინათ კი გაულურჯდა კიდეც. ძალიან შემეშინდა. დერმატოლოგმა დაუსვა დიაგნოზი - როზაცეა. რა დაავადებაა, რა იწვევს მას?

პასუხი: როზაცეა ანუ ვარდისფერი ფერიმჭამელები - კანის ერთ-ერთი გავრცელებული დაავადებაა. უპირატესად ემართებათ 30-დან 50 წლამდე ასაკის (უფრო ხშირად ქერა, ცისფერთვალება) ქალებს და ახასიათებს სახის კანის, განსაკუთრებით ცხვირისა და ლოყების, გაწითლება. ამ დროს კანზე ჩნდება მოვარდისფრო-მოწითალო ლაქები და კვანძები. გამომწვევი მიზეზები და განვითარების მექანიზმი ჯერჯერობით გაურკვეველია. რისკ-ფაქტორებს განეკუთვნება: კოფეინიანი და ალკოჰოლური სასმელები, სტრესები, ხშირი ულტრაიისფერი დასხივება, ჩასახვის საწინააღმდეგო ჰორმონული საშუალებები.

კითხვა: ენდოკრინოლოგმა დამინიშნა L-თიროქსინი 50 მკგ. ხომ არ მოვიმატებ წონაში? შეიძლება თუ არა მასთან ერთად იოდომარინის მიღება?

პასუხი: L-თიროქსინი არ იწვევს წონის მატებას, რადგან ინიშნება ჰიპოთირეოზის სამკურნალოდ, რომელსაც თავის მხრივ ახასიათებს წონის მატება. შესაბამისად, პრეპარატის კორექტული დოზით დანიშვნა აწესრიგებს ჰორმონებსაც და წონასაც. L-თიროქსინთან ერთად, იოდომარინის მიღება არ არის საჭირო.

კითხვა: ვარ 60 წლის, მაქვს მე-2 ტიპის დიაბეტი, პრეპარატებით კომპენსირებული (შაქარი მაქვს ნორმაში). მხედველობა მაინც მიუარესდება. რა არის მიზეზი? 

პასუხი: მიმართეთ ოკულისტს, იქნებ მხედველობის გაუარესება დამოუკიდებელ თვალის დაავადებას უკავშირდება.