2013 წლის გაზაფხულიდან ჰოლანდიის სამეფოს ახალი მეფე ჰყავს – დედოფალმა ბეატრიქსმა ტახტიდან გადადგომის გადაწყვეტილება მიიღო და სამეფო გვირგვინი თავის უფროს ვაჟს, პრინც ვილემ-ალექსანდერს უბოძა, რომელიც მეფედ აკურთხეს.

* ჰოლანდიის ახალი მეფის სრული სახელი და გვარია: ვილემ-ალექსანდერ კლაუს გეორგ ფერდინანდი. იგი ორან-ნასაუს სამეფო დინასტიის შთამომავალია, რომელიც ჰოლანდიაში 1815 წლიდან მეფობს.

* ვილემ მეოთხე გახდა პირველი მამაკაცი მონარქი ჰოლანდიაში 1890 წლიდან. საუკუნეზე მეტ ხანს ჰოლანდიაში დედოფლები იკავებდნენ სამეფო ტახტს: დედოფალი ვილჰელმინა, დედოფალი იულიანა და დედოფალი ბეატრიქსი. დიდი ბრიტანეთის მსგავსად, სამეფო ტიტული ჰოლანდიაში სიმბოლურია, ქვეყანას, ფაქტობრივად, მინისტრთა კაბინეტი მართავს.

* ვილემ-ალექსანდერი დაიბადა 1967 წლის 27 აპრილს, უტრეხტში, მომავალი დედოფლის – ბეატრიქსისა და პრინც კლაუს ფონ ამსბერგის – არისტოკრატის და დიპლომატის ოჯახში. ჰოლანდიის მეფეს ორი უმცროსი ძმა ჰყავს: პრინცები – იოჰან ფრიზო და კონსტანტინი.

* ვილემ-ალექსანდერს დამთავრებული აქვს ლეიდენის უნივერსიტეტი ისტორიკოსის სპეციალობით, ასევე, ის მსახურობდა ნიდერლანდების სამეფოს საზღვაო ძალებში. ვილემ-ალექსანდერს რამდენიმე სამხედრო წოდება აქვს.

* 18 წლის ასაკში ჰოლანდიის მეფე გახდა ნიდერლანდების სამეფოს სახელმწიფო საბჭოს წევრი. 1998 წლიდან ვილემ-ალექსანდერი სათავეში უდგას ჰოლანდიის ოლიმპიურ კომიტეტს და სამეფოს წარმოადგენს ოფიციალურ ღონისძიებებზე, როგორც შინაურ, ისე საგარეო ასპარეზზე.

* 1998-2010 წლებში ვილემ-ალექსანდერი ნიდერლანდების სამეფო ბანკის სამეთვალყურეო საბჭოს წევრი იყო, 1999-2010 წლებში კი კრელერ-მიულერის მუზეუმის მზრუნველთა საბჭოს წევრი.

* ჰოლანდიის მეფის ინტერესთა სფეროშია ჰიდროტექნიკა, ავიაცია და სპორტი. 1986-1992 წლებში ის ყოველწლიურად იღებდა მონაწილეობას ნიუ-იორკის ცნობილ მარათონში. 1987 წლიდან ვილემ-ალექსანდერი სამხედრო მფრინავის მოწმობის მფლობელია. მეფეს რამდენჯერმე აქვს მიღებული მონაწილეობა აფრიკაში ჩატარებულ ჰუმანიტარულ ოპერაციებში.

* ვილემ-ალექსანდერის მეუღლეა არგენტინელი მაქსიმე სორეგიეტა. მაქსიმეს მამა არგენტინელი დიქტატორის, ვიდალის მმართველობის პერიოდში, სოფლის მეურნეობის მინისტრის თანამდებობას იკავებდა. წყვილს სამი ქალიშვილი ჰყავს: კატარინა-ამალია ბეატრიქს კარმენ ვიქტორია, ალექსია ჯულიანა მარსელა ლაურენტინა და არიანა ვილჰელმინა მაქსიმა ინიესი.