ბიუჯეტს თეთრიც არ მოაკლდება

ბელორუსიის პრეზიდენტმა, თუმცა ევროკავშირთან თავისუფალ ვაჭრობას რფ-სთან საბაჟო კავშირი არჩია, გასულ კვირას „ბელაზის“ თანამშრომლებს მეტად საინტერესო რამ აუწყა, კერძოდ, პროექტ „დიდი ოჯახის“ დაწყება.

როგორც ევროპის უკანასკნელ დიქტატორად შერაცხილი ბ-ნი ლუკაშენკო გვპირდება (ჩვენ რა, ბელოუსიის მოქალაქეებს ჰპირდება), რამდენიმე ვარიანტი განიხილება, მაგალითად, ამგვარი: წყვილებს საბანკო ანგარიშს გაუხსნიან და ბავშვების შემატებისთანავე თანხას ჩაურიცხავენ (რაც მეტ ბავშვს გააჩენენ, მით მეტ თანხასაც მიიღებენ სახელმწიფოსგან: პირველისთვის – 10 000 აშშ დოლარს, მეორისთვის – 20 000-ს, მესამისთვის კი – გაორმაგებულს), იმის პარალელურად, რომ სახელმწიფო მათ ბინითაც უზრუნველყოფს.

მეორე მხრივ, არც ჩვენი მთავრობაა უქმად და, თუ მთლად შობადობის სტიმულირებას ვერ ეწევა, ჯანსაღ გარემოზე მაინც ზრუნავს. კერძოდ, გასულ კვირას, მაშინ, როდესაც ბ-ნი ლუკაშენკო მრავალშვილიანობის მატერიალური წახალისების გზებს ეძებდა, ჩვენებურებმა თამბაქოს კონტროლის 6-წლიანი გეგმა დაამტკიცეს, რისი მიზანიც, როგორც ჯანდაცვის სამინისტრომ გვაუწყა, თამბაქოს მოხმარებით გამოწვეული ზიანის შემცირებაა (ისე, არანაკლები, თუ მეტი არა, ზიანი არასრულფასოვან კვებას მოაქვს). ღონისძიებებს კი რამდენიმე მიმართულებით გვპირდებიან: აქეთ –  საგანმანათლებლოსკენ, იქით – თამბაქოზე აქციზის თანდათანობით გაზრდისა და ჯარიმების გააქტიურებისკენ.

ეს იდეაც, უდავოდ, კეთილშობილურია, ზედაც, ბიუჯეტის შევსებაზე ორიენტირებული და, რაც მთავარია, ბ-ნი ლუკაშენკოს იდეისგან განსხვავებით, მთავრობისგან მხოლოდ ქაღალდებზე ხელმოწერას მოითხოვს (ბიუჯეტს თეთრი არ მოაკლდება, რადგან, ხერხი სჯობია ღონესა, თუ მთავრობა მოიგონებსა)!