კითხვა: ძალიან დიდი სურვილი მაქვს, ჩემი შვილი მთელ დღეს ეკლესიაში ატარებდეს, ისწავლოს ლოცვები, ფსალმუნები, ახლოს გაეცნოს ეკლესიურ ცხოვრებას. ამჟამად ის 14 წლისაა – შემდეგ კი თვითონ გადაწყვიტოს, გახდება თუ არა სასულიერო პირი. როგორ მოვიქცე?

პასუხი: 14 წლის მოზარდმა თავად უნდა მიიღოს გადაწყვეტილება, უნდა თუ არა ასეთი ცხოვრება – მარტო თქვენი სურვილი არ კმარა. სასულიერო პირს ესაჭიროება სათანადო განათლება, რომელსაც იღებენ სასულიერო სემინარიასა და აკადემიაში.

კითხვა: რას ნიშნავს სიტყვა „იეღოვა“?

პასუხი: ბიბლიაში ღმერთის რამდენიმე სახელი გვხვდება. მაგალითად, „ელოჰიმ“, „საბაოთ“, „ადონაი“ და სხვა. ღმერთის ერთ-ერთი სახელია „იეღოვა“, რაც ებრაულად მყოფს, არსებულს ნიშნავს. რატომღაც იეღოველები უარყოფენ ღმერთის დანარჩენ სახელებს. მათ აირჩიეს ღმერთის მხოლოდ ერთი სახელი და ამიტომაც იწოდებიან იეღოველებად.

კითხვა: რამდენიმე თვეში ქორწინებიდან 15 წელი მისრულდება. როდესაც დავქორწინდით მე და ჩემმა მეუღლემ ჯვარი დავიწერეთ. შეიძლება თუ არა ამ თარიღთან დაკავშირებით სიმბოლურად კიდევ ერთხელ დავიწეროთ ჯვარი ეკლესიაში?

პასუხი: ჯვრისწერის რიტუალი მეუღლეებს შორის ერთხელ სრულდება, ამიტომ, ხელმეორედ ჯვრისწერა და ამგვარი სიმბოლური აქტის ჩატარება დაუშვებელია.

კითხვა: ჩაითვლება თუ არა გოგონა მონათლულად თუ ამ საიდუმლოს შესრულების დროს მას დედათა წესი ჰქონდა და არ გაამხილა?

პასუხი: ნათლობა შესრულებულად ჩაითვლება, ის მონათლულად ითვლება, მაგრამ ყოველ ქრისტიან მანდილოსანს უნდა ახსოვდეს, რომ დედათა წესის დროს თავი შეიკავოს საეკლესიო საიდუმლოებებში მონაწილეობისგან.