სერგო რატიანი – ეკა კეკელია

უმცირესობის წევრ სერგო რატიანის მეუღლე, ეკა კეკელია 1968 წელსაა დაბადებული თბილისში. მისი საკუთრებაა 50 კვადრატული მეტრი ფართობის საცხოვრებელი ბინა თბილისში, აბაშიძის ქუჩაზე. ქ-ნი კეკელიას მეუღლის მიერ შევსებული ბოლო დეკლარაციის მიხედვით, ის ააიპ საქართველოს პორტიჯის ასოციაციაში მუშაობს ადრეული განვითარების სპეციალისტად და ამ საქმიანობაში 2011 წლის განმავლობაში  7 648 ლარი აქვს მიღებული; მანამდე ეკა კეკელია ილიას სახელმწიფო უნივერსიტეტში მუშაობდა სუპერვაიზორად, მისმა წლიურმა ხელფასმა კი 5 575 ლარი შეადგინა. იმავე პერიოდში სერგო რატიანი ილიას სახელმწიფო უნივერსიტეტის ადმინისტრაციის ხელმძღვანელი გახლდათ 71 134-ლარიანი წლიური ხელფასით.

გიგლა აგულაშვილი – ქეთევან გილაშვილი

უმრავლესობის წევრის, პარლამენტის აგრარული კომიტეტის თავმჯდომარის, გიგლა აგულაშვილის მეუღლე, ქეთევან გილაშვილი, 1972 წელსაა დაბადებული ყვარელში. მათ სამი შვილი ჰყავთ: გიორგი, ლუკა და მათე. ქეთევან გილაშვილის საკუთრებაა 100 კვადრატული მეტრი ფართობის საცხოვრებელი სახლი თბილისში, კეკელიძის ქუჩაზე: ასევე, 2008 წლის გამოშვების მსუბუქი ავტომანქანა Suzuki Grang Vitara. დეკლარაციის შევსების მომენტში ქეთევან გილაშვილს ნაღდი ფულის სახით 7 000 ლარი ჰქონდა, გიგლა აგულაშვილს – 10 000 ლარი, გიორგი აგულაშვილს – 5 000 აშშ დოლარი. თუ დეკლარაციას ვერწმუნებით, ქ-ნი ქეთევანი არსად არ მუშაობს. 2011 წელს აგულაშვილების ოჯახს სასოფლო-სამეურნეო პროდუქციის რეალიზაციამ 19 000 ლარის შემოსავალი მოუტანა.

ირინა იმერლიშვილი – შალვა ბებოშვილი 

უმრავლესობის წევრის, პარლამენტის საპროცედურო კომიტეტის თავმჯდომარის, ირინა იმერლიშვილის მეუღლე, შალვა ბებოშვილი, 1971 წელსაა დაბადებული თბილისში. შალვა ბებოშვილის საკუთრებაა: მშენებარე სახლი თბილისში, ატენის ქუჩაზე – 129 კვადრატული მეტრი ფართობის; კომერციული ფართი თბილისში, ფალიაშვილის ქუჩაზე – 130 კვადრატული მეტრი ფართობის; საცხოვრებელი სახლი მცხეთაში – 960 კვადრატული მეტრი ფართობის; მშენებარე სახლი თბილისში, ატენის ქუჩაზე – 189 კვადრატული მეტრი ფართობის; არასაცხოვრებელი კომერციული ფართი თბილისში, გამსახურდიას შესახვევში; მიწის ნაკვეთი მცხეთაში – 600 კვადრატული მეტრი ფართობის; მიწის ნაკვეთის 50-პროცენტიანი წილი თბილისში, აღმაშენებლის ხეივნის მეთორმეტე კილომეტრზე (რევაზ მახარაძესთან და ზურაბ მარდახიაშვილთან ერთად); ასევე, იმავე პარტნიორებთან ერთად ფლობს იმავე მისამართზე კიდევ ერთი მიწის ნაკვეთის ფართობის 50-პროცენტიან წილს; მიწის ნაკვეთს თბილისში, ატენის ქუჩაზე, ამხანაგობა „ატენი-19-თან“ ერთად; მიწის ნაკვეთის 18,5-პროცენტიან წილს საგარეჯოს რაიონის სოფელ პატარძეულში – 20 000 კვადრატული მეტრი ფართობის (გიგლა აგულაშვილთან და დავით ბუაძესთან ერთად); იმავე პარტნიორებთან ერთად, პატარძეულში არსებული სათბურის 18,5-პროცენტიან წილს – 2 500 კვადრატული მეტრი ფართობით; კიდევ ერთ არასაცხოვრებელ ფართს პატარძეულში, იმავე პარტნიორებთან ერთად (240 კვადრატული მეტრი ფართობით) და მარნეულის რაიონში 110 000 კვადრატული მეტრი მიწის ფართობის 50-პროცენტიან წილს (გიორგი გოგილაშვილთან ერთად).

ქ-ნ იმერლიშვილის მეუღლეს ფალიაშვილის ქუჩაზე მდებარე კომერციულმა ფართმა 18 000 ლარის შემოსავალი მოუტანა; გამსახურდიას შესახვევში მდებარე კომერციულმა ფართმა კი – 3 600 ლარი; შპს „მწვანე ოქროს“ დირექტორობამ – 3 600 ლარი; შპს „მწვანე კალათის“ დირექტორობამ – 60 000 ლარი. იმავე პერიოდში ქ-ნი იმერლიშვილის, როგორც „რესპუბლიკური პარტიის“ რეგიონული და საარჩევნო მდივნის შემოსავალმა 27 000 ლარი შეადგინა. შალვა ბებოშვილს გასავალიც ჰქონდა: 16 200 ლარი  (100 000-დოლარიანი იპოთეკური სესხის დასაფარავად); 15 000-დოლარიანი სესხის მომსახურება 2011 წელს 4 080 ლარი დაუჯდა; 7 000-ლარიანი სამომხმარებლო სესხისა – 2 880 ლარი;  ასევე, მანვე დაფარა შვილების სწავლის გადასახადი, რაშიც 9 000 ლარი გადაიხადა.