„საჩუქარი“

დადასტურებული ფაქტია, რომ კოლიბაქტერიები ჩვენი მუდმივი თანამგზავრები ბრძანდებიან: იმ მარტივი მიზეზით, რომ არც ნაგვის გადამმუშავებელი ქარხნები გვაქვს, არც ცხოველთა აცრაა მოწესრიგებული (თავის დაკვლა-გატყავებიანად) და არც გამწმენდი ნაგებობები გაგვაჩნია, კოლიბაქტერიები ისე გრძნობენ თავს ჩვენს დედაბუნებაში, როგორც თევზი – წყალში.

თითქოს საკუთარი გაჭირვება არ გვყოფნიდა, გასულ კვირას შინაგან საქმეთა სამინისტროს სასაზღვრო პოლიციისა და გარემოს დაცვის სამინისტროს თანამშრომლებმა ფოთის პორტში უკრაინული თბომავალი დააკავეს, ერთი შეხედვით, მეტად პროზაული, უფრო ახლოდან კი – არცთუ უწყინარი მოტივით.

კერძოდ, გამოძიებით დადგენილა, რომ თბომავალ DONBAS VOYAGER-ის ეკიპაჟს ფოთის პორტის მე-4 ნავმისადგომთან საკუთარი ფეკალური მასები პირდაპირ ნაპირთან ახლოს, ზღვაში ჩაუღვრია (შეგახსენებთ: კოლიბაქტერია მხოლოდ ფეკალურ მასებში ცოცხლობს, შესაბამისად, მხოლოდ იქ ბინადრობს). ამიტომაც, თბომავლის უკრაინის მოქალაქე კაპიტანი პასუხისგებაშიც მიეცა (რაკი საქართველოს ადმინისტრაციულ სამართალდარღვევათა კოდექსის 58-ე მუხლის მეშვიდე ნაწილი დაარღვია).

მე რომ მკითხოთ (თუ ჩვენში კოლიბაქტერიების სიუხვეს გავიხსენებთ), სამართლიანი იქნებოდა მისი თბომავალი ჩვენი კოლიბაქტერიებით დაგვეტვირთა – თან, თავზესაყრელად არ გვაქვს თუ რა?!