ამერიკის შეერთებულ შტატებში მოღვაწე, წარმოშობით თბილისელმა, ცნობილმა მხატვარმა-კონცეპტუალისტმა დევიდ-დათუნამ და რუსმა სუპერმოდელმა, მსოფლიოს გავლენიანი ქალების ათეულში მყოფმა, სახელგანთქმულმა ნატალია ვოდიანოვამ ოქტომბრისთვის გრანდიოზული საქველმოქმედო აუქციონის ჩატარება დაგეგმეს. მოსკოვში, წითელ მოედანზე, ლენინის მავზოლეუმის მოპირდაპირე მხარეს დევიდ-დათუნას შვიდი ნამუშევარი გაიყიდება და შემოსული თანხა მთლიანად მოხმარდება სხვადასხვა მძიმე სნეულებებით დაავადებულ ბავშვებს. დევიდ-დათუნა და ნატალია ვოდიანოვა დიდი ხანია, თანამშრომლობენ საქველმოქმედო საქმეში, 2012 წელს დათუნას მიერ შექმნილი ვოდიანოვას პორტრეტი საქველმოქმედო აუქციონზე 790 ათას დოლარად გაიყიდა და თანხა მთლიანად დაავადებული ბავშვების დახმარების ფონდში გადაირიცხა.  გარდა ამისა, 2014 წელს დევიდ-დათუნა საქართველოში ახალი საქველმოქმედო ფონდის „დათუნა არტ ფაუნდეიშენის” დაარსებას გეგმავს, რომელიც ხელოვნების დარგში ნიჭიერი ბავშვების ხელშეწყობით და სწავლის პირობების გაუმჯობესებით იქნება დაკავებული. ფონდთან თანამშრომლობის სურვილი უკვე გამოთქვა რამდენიმე ავტორიტეტულმა საერთაშორისო საქველმოქმედო ორგანიზაციამ, მათ შორის ნატალია ვოდიანოვას ფონდმაც. ფონდის დაარსებასთან დაკავშირებულ დაწვრილებით ინფორმაციას ჩვენი ჟურნალის მომდევნო ნომრებიდან შეიტყობთ ექსკლუზიურად.