კითხვა: ვარ 60 წლის ქალბატონი. ექოსკოპიაზე დამიდგინეს მარჯვენა თირკმელზე დიდი ზომის კისტა – 55 მილიმეტრის დიამეტრით. საჭიროა თუ არა რაიმე მკურნალობა ან ოპერაცია?

პასუხი:  ჩვეულებრივ, ასეთ დროს რეკომენდებულია დაკვირვება 6 თვეში ერთხელ და ტრავმის თავიდან აცილება, თუმცა საბოლოოდ საკითხი ნეფროლოგმა უნდა გადაწყვიტოს. 

კითხვა: ვარ 21 წლის. ბავშვობიდან მაქვს ქრონიკული სურდო. მაინტერესებს, თუ იკურნება და რა საშუალებას მირჩევდით?

პასუხი: ასეთი სურდო უფრო ხშირად  ალერგიასთან არის დაკავშირებული და წარმოადგენს მის ერთ-ერთ ფორმას. უნდა დაინიშნოს  შესაბამისი მკურნალობა. შეგიძლიათ, მიმართოთ ყელ-ყურ-ცხვირის ექიმს ან ალერგოლოგს. სამწუხაროდ, დაავადება არცთუ იშვიათად ხასიათდება ქრონიკული მიმდინარეობით.

კითხვა: აბორტის შემდეგ რამდენ ხანში შეიძლება წყალში ჩასვლა?

პასუხი:  იდეალურ შემთხვევაში,  სასურველია, აბორტის შემდგომი პირველი მენსტრუაციის დასრულების შემდეგ.  თუ თქვენთვის ეს ძალიან დიდი დროა, წყალში ჩასვლის მომენტისთვის არ უნდა გქონდეთ არანაირი გამონადენი. ადრეული ბანაობის შემთხვევაში დიდია ინფიცირების რისკი.

კითხვა: რა იწვევს „ეგზოსტოზს“ და აუცილებელია თუ არა ოპერაცია?

პასუხი: ეგზოსტოზი არის ძვლოვანი ან ძვლოვან-ხრტილოვანი წანაზარდი ძვლის ზედაპირზე.  მისი გამომწვევი მიზეზებია:  ანთებითი პროცესი, ძვლისაზრდელასა და ხრტილის ანომალიები, ტრავმა, ინფექციური დაავადებები, ენდოკრინული სისტემის პათოლოგიები. მკურნალობა მხოლოდ ქირურგიული გზით შეიძლება, რაც გაზრდილი ძვლოვანი ქსოვილის მოკვეთას ითვალისწინებს.

კითხვა: ამბობენ, მჭადი არ ასუქებსო. თქვენ როგორ ფიქრობთ?

პასუხი: მჭადი შეიცავს კალორიათა არცთუ მცირე რაოდენობას. ამიტომ, დიდი ოდენობით მირთმევისას, შესაძლოა, წონაში მატებაც გამოიწვიოს.

კითხვა: რა ფორმით მიღებისას არის უფრო ეფექტური სტაფილო – წვენის სახით თუ ცოცხლად?

პასუხი: მეტი ეფექტისთვის უმჯობესია, სტაფილოს ახლად გაწურული წვენი მიირთვათ.

კითხვა: მაქვს ჭარბი ოფლიანობა, ფარისებრიც და სხვა ჰორმონებიც წესრიგში მაქვს. მართებულია თუ არა ამ დროს ბოტოქსის გაკეთება?

პასუხი: ბოტოქსის ინიექციები იღლიის არეში არის ჭარბი ოფლიანობის მკურნალობის ერთ-ერთი მეთოდი.

კითხვა: მაწუხებს ყურები, ყველაფერი თითქოს შორიდან მესმის. რა შეიძლება იყოს მიზეზი?

პასუხი: შესაძლოა იყოს ყურში ეგრეთ წოდებული გოგირდოვანი საცობი ან შუა ყურში მიმდინარე ანთებითი პროცესი. გირჩევთ, მიმართოთ ოტოლარინგოლოგს.