კითხვა: მშობიარობის შიშის გამო ჩემმა ორსულმა დამ გადაწყვიტა, საკეისრო გაიკეთოს. როგორ უყურებს ამ საკითხს ეკლესია?

პასუხი: ოპერაციული ჩარევა ეკლესიურად მიუღებელი არ არის, თუმცა, გასარკვევია, ასეთი ჩარევა გამოწვეულია უსაფუძვლო შიშის გამო თუ პათოლოგიური ჩვენებებით. ცხადია, უმჯობესი იქნება, მშობიარობა ფიზიოლოგიური გზით მოხდეს, ანუ ისე, როგორც უფალმა დააწესა.

კითხვა: ჩემი მეგობარი ერთ-ერთ სექტაში მოხვდა. გულით მინდა მისი დახმარება, მაგრამ, ვერაფრით ვეხმარები – არაფრის გაგონება არ უნდა. როგორც მოვიქცე?

პასუხი: ეცადეთ, არ შეწყვიტოთ მეგობრობა მასთან; პირიქით, თქვენი ზრუნვა, ყურადღება, სიყვარული, ლოცვა მისი სულის გადარჩენისთვის, დაეხმარება თქვენს მეგობარს რწმენის ჭეშმარიტი ნათელისა და ეკლესიის მადლმოსილების დანახვაში.

კითხვა: ხშირად გამიგია, გაბრაზებულ ადამიანს უთქვამს თავის შეურაცხმყოფებზე: ღმერთი გადაუხდის სამაგიეროსო. სწორია ასეთი საქციელი?

პასუხი: ღმერთს ნუ სთხოვთ შეურაცხმყოფლის დასჯას, ნუ ისურვებთ სხვათათვის იმას, რასაც საკუთარი თავისთვის არ ისურვებდით. თუ ვინმე გაწყენინებთ, მიენდეთ უფლის ბრძნულ განგებას – მან უკეთ იცის, როგორ მიაგოს მწყენინებლებს.

კითხვა: ამაღლდა თუ არა ქრისტე ხორციელი ბუნებითაც?

პასუხი: დიახ, მაცხოვარი ხორციელი ბუნებითაც ამაღლდა – ამაშია მთელი დიდება უფლისა – კაცი განეღმრთო. ღმერთმა ადამიანური ბუნება ზეცაში აიტანა, ადამიანი მარადიულად აქცია – ეს არის ამაღლებისა და აღდგომის მთელი საიდუმლო, თორემ, ღმერთი ისედაც უკვდავია. ქრისტეს ამაღლება ადამიანური ბუნების ამაღლებაა. წმინდა სამებაში ადამიანური ბუნებაც მოიაზრება.