მოტივზე: „ჩემი შენ გითხარიო“

მართალია, პათოსი ძველებურია (ანუ „ნაციონალური მოძრაობის“ წევრები, როგორც ძველად, ახლაც კვლავაც მიუწვდომლები არიან პირდაპირი დიალოგისთვის), მაგრამ, სამაგიეროდ, ფრიად ენაწყლიანობენ სოციალურ ქსელებში (ეს ენაწყლიანობაც მარტივი ასახსნელია: უსიამოვნო მოსაუბრეს დაბლოკავ და, ჩვეულებისამებრ, მონოლოგის რეჟიმში იმოქმედებ).

როგორც უნდა იყოს, სავარაუდოდ, რაკი საპარლამენტო ტრიბუნა ევიწროება, მაგალითად, ქ-ნი თაქთაქიშვილი საკანონმდებლო ორგანოში განსახილველ „კანონს ოკუპირებული ტერიტორიების შესახებ“ FB-ში ეხმაურება (ბუნებრივია, აღშფოთებული!).

კერძოდ, ქ-ნი თაქთაქიშვილი წრეგადასულადაა შეშფოთებული უმრავლესობის გაბედულებით (მოვიხმობ ციტატას მისი ნააზრევიდან): „ამ კანონის მიხედვით, საქართველოს სახელმწიფოს ექნება 2 ტიპის საზღვარი: ერთი – ოკუპირებულ ტერიტორიებსა და რუსეთს შორის, რომლის დარღვევა უცხო ქვეყნის მოქალაქეს დაუჯდება 400 ლარი და მეორე – საქართველოს დანარჩენ რეგიონებსა და რუსეთს შორის საზღვარი, რომლის დარღვევა სისხლის სამართლის კოდექსით დაისჯება.“

აქედან გამომდინარე, ხალხის ეს კონკრეტული რჩეული ასკვნის: „ივანიშვილი, ზაქარეიშვილი, ხიდაშელი, ძმები ბერძენიშვილები ბედავენ, რომ ქართველი ხალხი არჩევნების შემდგომი ეიფორიის ფონზე შეიტყუონ აფხაზეთისა და სამაჩაბლოს დამოუკიდებლობის აღიარების შეუქცევად პროცესში.“

შესაბამისად, ასკვნის: „ეს არ იქნება მხოლოდ ამ მთავრობის პასუხისმგებლობა, ამ გადაწყვეტილების შედეგებს ჩვენი მომავალი თაობები ზღავენ. გული მიკვდება – რა ხელში ჩავარდა ჩვენი ქვეყანა!“

თუ გავიხსენებთ, რომ ამ ჩვენს ერთ საქართველოში უკვე სამი პრეზიდენტია (ერთი, რომელსაც მზისქვეშეთში ყველა აღიარებს, ორიც – მხოლოდ ექვსთა მიერ აღიარებული), უნდა ვივარაუდოთ, რომ „რა ხელში“ დიდი ხანია ჩავცვენილვართ. მეორე მხრივ, თუ იმასაც დავამატებთ, რომ მთავარსარდალი და დღესაც ქ-ნი თაქთაქიშვილის თანაპარტიელი ბ-ნი სააკაშვილი 2008 წლის აგვისტოს ომს შემდეგნაირად აფასებდა – სულ რაღაც, ათი სოფელი დავკარგეთო, ცხადია, რომ კარგა ხანია და უიმედოდ გულმკვდრები ვყოფილვართ.