ყოველწლიური მუსიკალური ფესტივალი – Tbilisi Open Air – 2013 წელს განსაკუთრებით საინტერესო პროგრამას გვპირდება. ფესტივალი 5 ივნისს „დინამო არენაზე“ გაიმართება იმ ინტერესის გათვალისწინებით, რომელიც ფესტივალის მიმართ აქვს საზოგადოებას – სტადიონის ტრიბუნები ყველას დაიტევს. გასულ კვირას, „დინამო არენაზე“ გამართულ პრესკონფერენციაზე საჯარო გახდა ფესტივალში მონაწილე ლეგენდარული ჯგუფების ვინაობა. 5 ივნისისთვის თბილისს ეწვევიან: Deep Purple, Tricky, Infected Mushroom, The Subways, Black Strobe და Modeselektor. Tbilisi Open Air იქნება ყველაზე მასშტაბური მოვლენა მთელ ამიერკავკასიაში და ფესტივალის ისტორიის განმავლობაში, მასში მონაწილე არტისტების, ფორმატის, გარემოსა და მასშტაბის გამო. ფესტივალის ორგანიზატორია კომპანია „ალთერ ვიჟენ ჯგუფი”. გასული წელი ფესტივალის ისტორიაში მნიშვნელოვანი ეტაპი იყო, როცა თბილისს ეწვივნენ ჯგუფები – „დედეტე“ და „დუბ ეფიქსი“. მსმენელების რაოდენობამ, ორი დღის განმავლობაში, ჯამში 60 000 შეადგინა.