ჩვენ ვფიქრობთ, რომ ისინი ყველაზე ბედნიერი ადამიანები არიან – ყველაფერი აქვთ, რაც კი შეიძლება ინატრონ: დიდება, იახტები, ვილები ტროპიკულ კუნძულებზე,  ბრილიანტები და ბრენდები... მიუხედავად ამისა, ჰოლივუდის ვარსკვლავები ძალიან უბრალო „სიხარულებზე“ ოცნებობენ...

კეიტ ჰადსონს დედამ ასწავლა, რომ ყველა ადამიანს შეუძლია, იყოს ბედნიერი, თუკი დილით გაიღვიძებს და ის დღე კეთილად ჩაივლის. კეიტი ოცნებობს, რომ, ისევე, როგორც ბავშვობაში, კვლავ დედამ გააღვიძოს დილაობით. მაშინ ის უბედნიერესი იქნებოდა.

სანდრა ბალოკს სიხარულს სოფელში ცხოვრება მოუტანდა – სადმე, ტყის სიღრმეში ჩამდგარ ქოხში. მოუვლიდა ცხოველებს, ძროხასაც კი მოწველიდა.

კირა ნაითლი ამბობს, რომ დიდ სიხარულს მოჰგვრიდა სახლის მშენებლობაზე მუშაობა: ლურსმნების მიჭედება, ფიცრების გაშალაშინება...

კეიტ უინსლეტი ამბობს, რა კარგი იქნებოდა, მხოლოდ დიასახლისობით რომ ვიყო დაკავებულიო.  დავდგებოდი გაზქურასთან და უამრავ ორიგინალურ კერძს მოვიგონებდი და თან ვიღიღინებდიო, – ოცნებობს „ტიტანიკის“ ვარსკვლავი.

ქემერონ დიასის ოცნებაა, ჰქონდეს იმდენი დრო, რომ ხელით რაღაც აქსესუარები, ლამაზი ნივთები შექმნას... შეკეროს ან მოქსოვოს, თუმცა, ალბათ, ჯერ კერვა და ქსოვა უნდა ისწავლოს...