ეგვიპტეში პრინცესა შერტ ნებტის სამარხი იპოვეს, რომელიც 4,5 ათასი წლის წინათ ცხოვრობდა. სამარხი მეხუთე დინასტიით თარიღდება. ის, რამაც არქეოლოგები გააოგნა, იყო სამარხის ადგილმდებარეობა. საქმე ისაა, რომ მეხუთე დინასტიის სამეფო ოჯახის დანარჩენი წევრები ამ ადგილიდან თითქმის ორი კილომეტრის მოშორებით არიან დაკრძალულნი. „მარადისობის სახლის“ – ანუ სამარხების ეგვიპტისეული მოწყობის პრინციპით, ეს სრულიად დაუშვებელია. ეჭვის საფუძველს იძლევა თავად ჩასასვენებელიც. მას არანაირი მოსართავი არ აქვს. წარწერაც უბრალოა: „შერტ ნებტი – ფარაონის ქალიშვილი“. არსად არის სავალდებულო სიტყვები: „ღვთის რჩეული და მისი საყვარელი ქალიშვილი“. ისტორიკოსებმა და არქეოლოგებმა გადაწყვიტეს, რომ ეს სწორედ ის ეგვიპტელი პრინცესაა, რომელიც მდაბიოზე გათხოვდა და ფარაონი მამის რისხვა დაიმსახურა.