ამერიკელი მომღერალი ბიონსე ნოულზი 21 იანვარს, ბარაკ ობამას ინაუგურაციის დღეს, ამერიკის შეერთებული შტატების ჰიმნს შეასრულებს. საზეიმო ინაუგურაცია ვაშინგტონში, კაპიტოლიუმის წინ გაიმართება და ბარაკ ობამა მეორე ვადით ოფიციალურად შეუდგება პრეზიდენტის მოვალეობის შესრულებას. აღსანიშნავია, რომ ეს არ არის პირველი შემთხვევა, როდესაც ბიონსე ნოულზი ობამასთვის იმღერებს – პირველად პოპ-ვარსკვლავმა 2009 წელს იმღერა ობამას პირველი საპრეზიდენტო ვადის დაწყებისთვის ორგანიზებულ გალა-საღამოზე. ბიონსე ნოულზი ობამას ერთ-ერთ ყველაზე ცნობილ მხარდამჭერად ითვლება მეუღლესთან, რეპერ ჯეი-ზისთან ერთად. საპრეზიდენტო არჩევნების პერიოდში ვარსკვლავურმა წყვილმა ობამას საარჩევნო შტაბის დასახმარებლად 4 მილიონამდე დოლარის შეგროვება მოახერხა.