სტიქიის მოიმედენი

გასულ კვირას უამინდობამ საქართველოს მთელი ტერიტორია მოიცვა, მათ შორის – ოკუპირებულიც, თუმცა, არაოკუპირებულ ტერიტორიაზე ყველაფერმა შედარებით მშვიდობიანად ჩაიარა, აი, ოკუპირებულ ცხინვალის რეგიონში კი, როკის გვირაბთან განლაგებული რუსული საოკუპაციო ჯარის ნაწილს ზვავი ჩამოაწვა. ეს ვისთვის სამწუხარო, ხოლო ვისთვის არცთუ, ინფორმაცია „იუჟნაია ოსეტიას“ ბეჭდვისა და ინფორმაციის კომიტეტმა გაავრცელა, რის მიხედვითაც, ზვავს სერიოზული ზიანი მიუყენებია სამხედრო ნაწილის ნაგებობებისთვის, მაგრამ, ერთი ისაა, რომ სტიქიას უმსხვერპლოდ ჩაუვლია.

ამას გარდა, ზვავების გამო ჯერჯერობით დაკეტილია ტრანსკავკასიური მაგისტრალი. ეს მცირე დეტალიც მოწმობს, რომ ვერანაირი „იუჟნაია ოსეტია“ ბუნებაში ვერ იარსებებდა, ან, თუ იარსებებდა, ჩრდილოეთ ოსეთთან ყოველგვარი კავშირის გარეშე.

ჩვენ არ ვიცით, დააფიქრებს თუ არა თუნდაც სტიქია ჩვენს სეპარატისტებსა და ოკუპანტებს, თუმცა, თუ ზემონახსენებ კონკრეტულ ზვავს გავიხსენებთ, რაც მართალია, მართალია ჩვენი გასაკეთებელი საქმე თავის თავზე აუღია.