გერმანიის ნაკრების ექსფეხბურთელს, ამ ზაფხულს კარიერადასრულებულ მიხაელ ბალაკს 6,7 ათასი ევროს ოდენობის ჯარიმის გადახდა მოუწევს. ესპანურ მარბელიაში ყოფნის პერიოდში ბალაკმა საკუთარი ავტომობილით 210 კილომეტრ-საათში სიჩქარით ჩაიქროლა, მაშინ, როცა მხოლოდ 120 კილომეტრ-საათი სიჩქარეა დაშვებული. ესპანურმა პატრულმა მალევე გააჩერა სისწრაფის მოყვარული ფეხბურთელი და ჯარიმა გამოუწერა. გარდა ამისა, ვეტერან ფეხბურთელს წლინახევრით ჩამოართვეს მართვის მოწმობა. საინტერესოა, რომ, სასამართლოზე, სადაც ბალაკმა თავისი ჯარიმა გაასაჩივრა, მისმა ადვოკატმა განაცხადა, რომ მისი კლიენტი ამჟამად უმუშევარია, არ შეუძლია აღნიშნული ჯარიმის ერთბაშად გადახდა და დროის გადავადება მოითხოვა. იხუმრა თუ არა ბალაკმა, ჯერჯერობით უცნობია.