გერმანელმა მოქანდაკემ და შეთავსებით მუსიკოსმა, ვიტა დიდელ კლევერმა, მსოფლიოს ყველაზე სწრაფი ადამიანი, ექვსგზის ოლიმპიური ჩემპიონი, იამაიკელი სპრინტერი უსაინ ბოლტი თანამედროვე ხელოვნების ახალ ნიმუშში უკვდავყო. კლევერმა 2009 წელს დაწყებული პროექტი დაასრულა და საზოგადოების სამსჯავროზე გამოიტანა. მოქანდაკემ რკინის დეტალებისგან, ძირითადად, ჭანჭიკებისგან ააწყო ბოლტის ქანდაკება და ბერლინელ დამთვალიერებელს წარუდგინა თანამედროვე ხელოვნების მუზეუმში. „ბოლტი უნიკალური სპორტსმენია, გარდა ამისა, ჩემი მეუღლე იამაიკიდან არის წარმოშობით და ეს ქვეყანა განსაკუთრებით მიყვარს,” – განუცხადა ჟურნალისტებს კლევერმა.