„ჩელსის” ნახევარმცველი, 34 წლის ფრენკ ლამპარდი, შესაძლოა, ზამთრის სატრანსფერო პერიოდში ჩინური „გუიჩჟოუ ჟენხეს” წევრი გახდეს. ინგლისის ნაკრების ფეხბურთელი ბოლო დროს ვერ ხვდება კლუბის ძირითად შემადგენლობაში და ჯანმრთელობის მხრივაც პრობლემები გაუჩნდა, ამიტომ, შესაძლოა, რობერტო დი მატეომ მისი გასხვისება მოინდომოს, რადგან, უკვე არსებობს რეალური წინადადება ჩინური კლუბიდან. ჩინურ კლუბის მილიონერი მფლობელი, ვან გოლინი, ლამპარდს ხელფასის სახით კვირაში 250 ათას გირვანქა სტერლინგს პირდება. ვან გოლინს გადაწყვეტილი აქვს, თავისი კლუბი საუკეთესოდ აქციოს ჩინეთში და ამისთვის თანხების დაზოგვას არ აპირებს. ცნობისთვის, ჩინეთში უკვე ასპარეზობენ „ჩელსის” ექსფეხბურთელები – ნიკოლა ანელკა და დიდიე დროგბა.