კითხვა: გამიგონია, რომ სარკის გადაგდება არ ვარგა. სად წავიღო სარკეები, რომლებიც არ მჭირდება?

პასუხი: ეს, რა თქმა უნდა, ცრურწმენაა და სარკეს ისე უნდა მოექცეთ, როგორც ჩვეულებრივ ნივთს. საეკლესიო წესებით, არავითარი მნიშვნელობა არ აქვს, სარკეს შეინახავთ თუ გაასხვისებთ. გირჩევთ, ამგვარ ცრურწმენებს ყურადღებას ნუ მიაქცევთ.

კითხვა: აქვს თუ არა მნიშვნელობა იმ მასალის ხარისხს, რომლისგანაც ჯვარია დამზადებული?

პასუხი: არანაირი მნიშვნელობა არ აქვს მასალას, თუ რისგან არის დამზადებული ჯვარი. სადა და უბრალო ჯვარი იმავე შემწეობას მოგანიჭებთ, რასაც ძვირფასი მასალისგან დამზადებული.

კითხვა: ჩემს მეზობელს უფლის ხატი გავატანე ეკლესიაში საკურთხებლად. მან ჩემი ხატიც თავის ხატებთან ერთად აკურთხებინა  მოძღვარს თავის სახელზე. მაინტერესებს, ამის შემდეგ ეს ხატი მე მეკუთვნის თუ მას?

პასუხი: ხატის კურთხევა არ ხდება ვინმეს სახელზე. ხატის კურთხევის ლოცვაში მისი მფლობელის სახელი არ იხსენიება. ამდენად, ხატი თქვენ გეკუთვნით.

კითხვა: გარდაცვლილი მეუღლის ფოტოები დღემდე მიკიდია ოთახებში. ახლობლები მირჩევენ, ჩამოვხსნა და შევინახო. როგორ მოვიქცე?

პასუხი: თქვენი ახლობელი, საყვარელი გარდაცვლილი ადამიანის ფოტო უნდა შეინახოთ, მაგრამ, არა იმ ფორმით, რომ უხერხულობა შეუქმნათ ახლობლებსა და საკუთარ თავს. იქონიეთ ეს ფოტოები ალბომებში ან მოათავსეთ სახლის რომელიმე მოკრძალებულ ადგილას.