სულ მალე მსოფლიო კინოთეატრების დიდ ეკრანებზე ვიქტორ ჰიუგოს უკვდავი ნაწარმოების „საბრალონის” ახალი ჰოლივუდური ეკრანიზაციის პრემიერა შედგება. ფილმში არაერთი ვარსკვლავი მონაწილეობს, მათ შორის ჟან ვალჟანის როლს ავსტრალიელი სუპერვარსკვლავი ჰიუ ჯეკმანი ასრულებს. „თბილისელების” ამ ნომერში გთავაზობთ საინტერესო ფაქტებს მილიონობით მანდილოსნის საოცნებო ვარსკვლავზე.
* ვარსკვლავის სრული სახელია ჰიუ მაიკლ ჯეკმანი.
* მისი მშობლები გახლდნენ ემიგრანტები დიდი ბრიტანეთიდან – კრის ჯეკმანი და გრეის უოტსონი. ჰიუ უმცროსი შვილი იყო კრისისა და გრეისის შვიდსულიან ოჯახში.
* ჰიუ 8 წლის რომ იყო, მისი მშობლები ერთმანეთს დაშორდნენ, გრეისი ინგლისში დაბრუნდა, ჰიუ და მისი და-ძმები კი მამასთან დარჩნენ. ჰიუ ჯეკმანმა ურთიერთობა დედასთან ზრდასრულ ასაკში აღადგინა.
* ჰიუ ჯეკმანი ცაციაა.
* ჰიუ ჯეკმანს ცუდი მხედველობა აქვს და ძირითადად კონტაქტურ ლინზებს იყენებს, იშვიათად კი – სათვალეს.
* რეალურ ცხოვრებაში ჰიუ ჯეკმანი სიგარეტს არ ეწევა, ფილმებში კი თამბაქოს, მათ შორის, სიგარების ხშირი მომხმარებელია.
* ჰიუ ჯეკმანის საყვარელი კერძია სუში.
* პროფესიონალურად უკრავს ფორტეპიანოზე, ვიოლინოსა და გიტარაზე.
* თავისუფალ დროს ჯეკმანი გატაცებულია გოლფის, რაგბის, კრიკეტის თამაშით. დაკავებულია ვინდსერფინგით, ხტება სიმაღლიდან, დაფრინავს პარაპლანით, ცურავს კანოეთი და განსაკუთრებით უყვარს საფარი.
* ჰიუ ჯეკმანს ერთდროულად ხუთი პატარა ბურთულით შეუძლია ჟონგლიორობა.
* საყვარელი ავტომობილი – „რეინჯ როვერი“.
* ჰიუ ჯეკმანის მეუღლე, დებორა ლუ ფურნესი 13 წლით უფროსია ქმარზე. ისინი 1996 წლიდან ცხოვრობენ ერთად. წყვილმა ერთმანეთი სერიალ „კორელის” გადასაღებ მოედანზე გაიცნო, იმ დროს ჰიუ დამწყები მსახიობი იყო და მხოლოდ ოცნებობდა ჰოლივუდზე.
* ჰიუს და დებორას ორი შვილი ჰყავთ, ორივე ნაშვილები. 2000 წელს დაბადებული ვაჟი, მაქსიმილიანი და 2005 წელს დაბადებული ქალიშვილი, ავა ელიოტი. შვილების აყვანა წყვილმა მას შემდეგ გადაწყვიტა, რაც საბოლოოდ გახდა ცნობილი, რომ დებორასთვის დაფეხმძიმება სასიკვდილო იქნებოდა.
* პოპულარული ფილმის „ადამიანი იქსის” პირველი სერიის გადაღებებისას ჰიუ ჯეკმანს თავისუფლად შეეძლო, დაწოლილს აეწია 143-კილოგრამიანი შტანგა.
* ერთ-ერთ ინტერვიუში ჰიუმ გაიხსენა, რომ როდესაც „ადამიანი იქსის” ერთ-ერთ სერიაში იღებდნენ, სახლში ხშირად ყოფნას ვერ ახერხებდა და ძლიერ ენატრებოდა შვილს, მაქსიმილიანს. იმისთვის, რომ შვილს მამა მუდამ გვერდში ჰყოლოდა, ჰიუმ მოიფიქრა და ვაჟს თავისი გმირის, როსომახას თოჯინა აჩუქა. ბავშვი მასთან ერთადაც იძინებდა და მუდამ თან დაატარებდა.
* ჰიუ ჯეკმანის ახლო მეგობრებად ითვლებიან: ლივ შრაიბერი, სკარლეტ იოჰანსონი, ჯონ პალერმო, ნაომი უოტსი, ერიკ ბანა, ნიკოლ კიდმანი და კიტ ურბანი. მათი უმეტესობა ავსტრალიელია.
* ჰიუ ჯეკმანის კომიქსების საყვარელი პერსონაჟი როსომახა კი არა, სუპერმენია.
* 2009 წელს ჰიუ ჯეკმანს პატივი ერგო „ოსკარების” დაჯილდოების ცერემონიალის წამყვანი ყოფილიყო. კრიტიკოსების აზრით, იგი იყო ერთ-ერთი საუკეთესო წამყვანი დაჯილდოების არსებობის ისტორიაში.
* საყვარელი მუსიკოსი – ფილ კოლინზი, ფილმში „როსომახა” ჰიუ ჯეკმანის ეკრანული პარტნიორის, ლილი კოლინზის მამა.
* ჰიუ ჯეკმანი სამსახიობო ოსტატობას შეასწავლის 10-12 წლის ბავშვებს, თავისი შვილის, მაქსის თანაკლასელებს.
* მას შემდეგ, რაც ჰიუ ჯეკმანი პლანეტის ყველაზე სექსუალურ მამაკაცად დასახელდა, ერთ-ერთ ჟურნალს ვარსკვლავმა უთხრა: „ნორმალურ ადამიანად დარჩენაში მეუღლე მეხმარება, ყოველ დილით მეუბნება – ჰეი, შენ სექს-ბოი, მიდი, ნაგავიც გადაყარეო.
* ჰიუ ჯეკმანი ერთადერთი მსახიობია ბროდვეიზე, რომელსაც  ყველა სახის თეატრალური პრემია აქვს მიღებული ერთი სეზონის განმავლობაში.
* სკოლაში ჰიუ ჯეკმანს „ჭიას” ეძახდნენ, რადგან ძალიან გამხდარი და მაღალი იყო.
* ჰიუ ჯეკმანის სიმაღლე 190 სანტიმეტრია.
* ჰიუ ჯეკმანი საშინელებათა ჟანრის ფილმების დიდი მოყვარულია, განსაკუთრებით უყვარს – „პარასკევი 13-ის“ ყველა სერია, „ომენი”, „ჰელოუინი” და „სალემი”.
* სკოლის დამთავრების შემდეგ ჰიუ ჯეკმანი სიდნეის ტექნოლოგიურ უნივერსიტეტში მოეწყო ჟურნალისტიკის ფაკულტეტზე. ჯეკმანს მიღებული აქვს ბაკალავრის დიპლომი ჟურნალისტიკაში კომუნიკაციის სპეციალიზაციით, თუმცა, სწავლების დასრულებამდე, ის მიხვდა, რომ ჟურნალისტიკა ნაკლებად იზიდავდა და თეატრალური სცენით დაინტერესდა, სადაც თავდაპირველად, მოყვარულის დონეზე დაიწყო თამაში.
* 1992 წელს ჰიუ ჯეკმანმა პერტის სასცენო ხელოვნების აკადემიაში ჩააბარა. სწავლის გადასახადი ბებიისგან მემკვიდრეობით მიღებული 3 500 დოლარით გადაიხადა.
* აკადემიაში სწავლის პერიოდში ჰიუ ჯეკმანს ერთ-ერთი მთავარი როლი შესთავაზეს  ცნობილ ავსტრალიურ სერიალში „მეზობლები”. თუმცა, იმ მოტივით, რომ ლექციების გაცდენა მოუწევდა, ჰიუმ სერიალში თამაშზე უარი თქვა.
* ჰიუ ჯეკმანი, პრაქტიკულად, არ მოიხმარს ალკოჰოლს.
* „როსომახას” ბრჭყალების სათანადოდ გამოყენებისთვის, ექშენ-სცენების გადაღებებამდე, ჰიუ ჯეკმანმა სპეციალური მომზადება გაიარა სპეცდანიშნულების რაზმის მებრძოლებთან.
* „ადამიანი იქსის” მთელი გადასაღები პერიოდის დროს ჰიუ ჯეკმანი ცივ შხაპს იღებდა, რათა ეკრანზე მის გმირს უფრო გაბრაზებული იერი ჰქონოდა.
* ჰიუ ჯეკმანი ჩაი „ლიპტონის” სარეკლამო სახეა.
* დარენ არანოფსკის ფილმში „შადრევანი” მონაწილეობის მისაღებად ჰიუ ჯეკმანს მოუხდა სხეულზე არსებული თმის მოშორება, მათ შორის თავის სრული გადაპარსვა.
* თავდაპირველად, როსომახას როლი „ადამიან იქსში” დაგრეი სკოტს უნდა შეესრულებინა. თუმცა, ის ტომ კრუზმა მიიწვია ფილმში „შეუსრულებელი მისია 2” და პროდიუსერების ერთადერთი ვარიანტი მაშინ მთავარ როლზე იყო ყველასთვის უცნობი ავსტრალიელი ჰიუ ჯეკმანის მიწვევა.
* „ვან ჰელსინგის” გადაღებების დროს ჰიუ ჯეკმანმა შემთხვევით ერთ-ერთ სცენაში კასკადიორს ხელი მოტეხა.
* ამჟამად ჰიუ ჯეკმანი ოჯახთან ერთად ნიუ-იორკში ცხოვრობს.