„მანჩესტერ იუნაიტედის” მცველს, რიო ფერდინანდს, მანჩესტერის პოლიციამ ექვსი თვით ჩამოართვა ავტომობილის მართვის მოწმობა. ფერდინანდი სისტემატურად არღვევდა მოძრაობის წესებს – თავისი ჩქაროსნული „იაგუარით” მან დაშვებული სიჩქარის ლიმიტს რამდენჯერმე გადააჭარბა და ყველა დარღვევა სათვალთვალო კამერების ობიექტივში მოხდა. საბოლოოდ, რიო ფერდინანდს მანჩესტერის სასამართლომ ექვსი თვით ჩამოართვა მართვის მოწმობა და, ასევე, 550 ფუნტი სტერლინგის გადახდა დააკისრა ჯარიმის სახით. საინტერესოა, რომ ეს არ არის პირველი შემთხვევა, როდესაც ფერდინანდს ავტომობილის მართვის გამო აჯარიმებენ: 1997 წელს იგი საჭესთან არაფხიზელ მდგომარეობაში გამოიჭირეს პოლიციელებმა, 2002 და 2003 წლებში სიჩქარის გადაჭარბების გამო დააჯარიმეს, ხოლო 2005 წელს, ასევე სიჩქარის გადაჭარბების გამო, მართვის მოწმობასთან ერთად, ფერდინანდს ავტომობილიც ჩამოართვეს.