წინა კვირას გასაყიდად გამოვიდა გინესის რეკორდების წიგნის 57-ე გამოცემა. გაუმჯობესებული მიღწევების გარდა, მასში შესულია ახალი, ჯერ კიდევ დაუფიქსირებელი რეკორდებიც:
* 24 წლის ამერიკელი მუსტაფა ისმაილის უპროპორციო ბიცეპსების გარშემოწერილობა 78 სანტიმეტრია. კომიქსებისა და მულტფილმების გმირის, მეზღვაურ პოპიასგან განსხვავებით, ის ვერ იტანს ისპანახს,  სამაგიეროდ, ქათმის ხორცს ჭამს უზომოდ ბევრს... ამ რეკორდის მისაღწევად მუსტაფა ათი წლის განმავლობაში, დღეში ორჯერ ვარჯიშობდა სიმძიმეების აწევაში.
* გინესის რეკორდების წიგნში შევიდა უხუცესი ტანმოვარჯიშე, ყოფილი ფიზკულტურის მასწავლებელი, 86 წლის იოჰანა კაასი ლაიფციგიდან. მისი გამოსვლა გერმანიის ქალაქ კოტბუსში გამართულ სპორტული ტანვარჯიშის მსოფლიო თასის გათამაშებაში, შესვენების დროს, You Tube-ის ჰიტი გახდა.
* ყველაზე მძიმე სპორტსმენად აღიარეს სუმოს მოჭიდავე, ლონდონელი შარან ალექსანდერი. მისი წონა 203,2 კილოგრამია. რინგზე ფორმის შესანარჩუნებლად იგი დიდი რაოდენობით მაღალკალორიულ საკვებს იღებს.
* ყველაზე დიდი ცხენი ჰყავთ ამერიკაში, ვისკონსის შტატში. ესაა ბელგიური მერინი, რომელსაც სახელად „ჯეიკი“ ჰქვია. მისი სიმაღლე ქეჩომდე 213 სანტიმეტრია (საშუალო სიმაღლე კი – 160 სანტიმეტრი).
* სახარე ხბო, სახელად „არჩი“, ჩრდილოეთ ირლანდიის ანტრიმის საგრაფოში სახორცედ შეიძინეს, თუმცა, ორი წლის განმავლობაში ის მხოლოდ 78 სანტიმეტრამდე გაიზარდა. პატრონებს პაწაწინა ხარი ისე შეუყვარდათ, რომ დასაკლავად ვეღარ გაიმეტეს.
* ამერიკაში, მიჩიგანის შტატში, ცხოვრობს მსოფლიოში ყველაზე მაღალი ძაღლი – 3 წლის გერმანული დოგი – „ზევსი“. მისი სიმაღლე 1 მეტრი და 12 სანტიმეტრია, ხოლო, როდესაც უკანა თათებზე დგება და აიწევა, 223 სანტიმეტრს აღწევს.
* „ბარბების“ ყველაზე დიდი კოლექცია აქვს გერმანელ ქალბატონს, 52 წლის ბეტინა დორფმანს. პირველი თოჯინა მან 1993 წელს იყიდა, დღეისთვის კი მისი კოლექცია 15 ათასს ითვლის.
* ყველაზე მაღალ ვარცხნილობას, თურმე, იაპონელი დიზაინერი – კაძუხირო ვატანაბი ატარებს. მისი იროკეზის სიმაღლე 113 სანტიმეტრია. ამ ვარცხნილობის გაკეთებაში ვატანაბის სამი პარიკმახერი ეხმარება, რომლებსაც 3 ფლაკონი თმის ლაკი და მთელი ბოთლი სპეციალური გელი დასჭირდათ. იროკეზს კაძუხირო მხოლოდ სადღესასწაულო საღამოებისთვის იკეთებს. ის თმას 15 წლის განმავლობაში იზრდიდა.
აღსანიშნავია, რომ „გინესის რეკორდების წიგნი“ 22 ენაზე 100-ზე მეტ ქვეყანაში გამოდის. 2013 წლისთვის გამომცემლები 2,7 მილიონი ეგზემპლარის გამოცემას გეგმავენ.